Сценæйыл – Цыколайы 4-æм рæвдауæндоны хъомылгæнинæгтæ. Æвзонг артисттæ дыууæ къуырийы æркастмæ цæттæ кодтой “Хæлардзинады аргъау”. Хъæды цæрæгойтæ хъæлдзæгæй æрвитынц сæ рæстæг. Халон сæм бахæлæг кодта æмæ сæ сфæнд кодта кæрæдзиуыл сардауын, фæлæ йæ хъуыдыйæ ницы рауад. Сæ равдыст фыццаг бынат бацахста Æрæфы районы æмæ ныр архайынц республикон къæпхæны.
Æркаст “Иры фидæн”-ы республикон къæпхæны сæ арæхстдзинад æвдисынц районты уæлахиздзаутæ. Сабитæ сæ хъомылгæнДЖЫТИМÆ иумæ бацæттæ кодтой аргъæуттæ, ирон авторты уацмыстæй скъуыддзæгтæ мадæлон æвзагыл. Æмæ кæд нырма чысыл ‘сты, уæддæр сæ къухы бафтыд ирд æмæ цымыдисаг сурæттæ саразын.
Дыууæ кары къорды сывæллæтты курдиатæн аргъ кæндзысты фæлтæрдджын жюрийы уæнгтæ. Се ‘хсæн Æппæтуæрæсеон æркастыты уæлахиздзаутæ, наукон иртасджытæ, ирон æвзаджы райрæзты центры кусджытæ. Конкурсантты цæттæдзинадæй разыйæ баззадысты.
Æрвылазон æркаст арæзт у дыууæ къæпхæнæй. Республикон ахæсдзæн дыууæ боны. Сæ арæхстдзинад равдисдзысты æппæт районты сывæллæтты рæвдауæндæтты хъомылгæнинæгтæ. Сабитæн арфæ ракодтой республикæйы ахуырад æмæ наукæйы министрады минæвæрттæ.
Республикæйы стыр æргом здахынц фæсивæды хъомыладмæ. Кæстæрты сабийæ разæнгард кæнынц нæ культурæмæ. Сфæлдыстады фæрцы сæ курдиат раргом кæнын та у ацы æркасты сæйраг нысантæй иу.
