«Повара на колесах», зæгъгæ, хæринæгтæ кæныны равдыст систой Дзæуджыхъæуы. Нæ бæстыйы хуыздæр ресторанты хæринаггæнджытæ балцы ацæуынц Уæрæсейы регионтæм. Алы ран дæр базонгæ вæййынц бынæттон культурæ æмæ традицитимæ. Сцæттæ кæнынц бынæттон хæринæгтæ дæр. Равдысты хъайтартæн нæ республикæйы уазæгуарзондзинад æмæ хъæздыг культурæ сæ зæрдæтæ балхæдтой. Ног равдыстмæ бакæсæн уыдзæн Фыццæгæм каналы эфиры 5-æм мартъийы.
Цымыдисаг балц. Бынæттон адджын æмæ дзаджджын фынгтыл афæлгæст. Ахæм хæринæгтæ сцæттæ кæнын, æмæ Мишлены стъалыты аккаг чи суой. Фыццæгæм каналы равдыст, хæринаггæнджыты ныхмæлæуд «Повара на колесах», зæгъгæ, ног равдысты рауагъд систой Ирыстоны.
Æппæты зæрдæмæдзæугæ æмæ адджыдæр цау æвдыст цæуы телевизоры экраныл. Хæринаггæнджытæ Роман Редман æмæ Никита Сечин сæ нывджын хæдтулгæйы Дзæуджыхъæуы сæйраг фæзыл цæттæ кодтой бынæттон цæрджыты уарзондæр хæринæгтæ.
Зындгонд хæринаггæнджытæ æртæ бонмæ бабæрæг кодтой бынæттон хойраджы базар дæр. Уæвгæ, сæ цæст ахастой Дзæуджыхъæуы рæсугъддæр æмæ цымыдисагдæр бынæттыл. Уæлмонц æнкъарæнтыл сæ бафтыдтой нæ хæхтæ. Уæгъдибар хъæбысхæсты академийы та сын дæсныйадæвдисæн ахуырты фæлгæты равдыстой æмæ радзырдтой ацы спорты хуызы сусæгдзинæдтæ.
Цæгат Ирыстон ацы аз сси Кавказы регионтӕй фыццаг, Фыццæгæм каналы сфæлдыстадон къорд йæ равдыст исынмæ кæдæм саккаг кодта. Равдысты сæйраг нысан — бынæттон хæринæгтæй акомдзаг кæнын, æмæ сæ, фæстæмæ ацæугæйæ, адæмæн цæттæ кæнын сæ хæрæндæтты.
Хæринаггæнджыты равдыст армы тъæпæныл æрæвæрæгау æвдисы, Уæрæсейы цы адæмыхæттытæ цæры, уыдоны хæринæгты хъæздыгдзинад. Равдысты сæйраг хъайтартæ канд хæринæгтæй нæ хынцынц, фæлæ ма стыр æххуыс сты туристон балцвæд саразынæн дæр. Роман Редман æмæ Никита Сечин сæхæдæг куыд зæгъынц, афтæмæй Ирыстоны туристон хъомыс у егъау.
