Æхсызгон æмæ ахсджиаг цау. Цæгат Ирыстоны кадджын уавæры байгом ихын фæз «Тагбан». Мадзалы архайдтой республикæйы сæргълæууæг Сергей Меняйло, Уæрæсейы зынгонд спортсментæ – хоккеист, Паддзахадон Думæйы депутат Вячеслав Фетисов, фигуристтæ Шанаты Елизаветæ æмæ Павел Дрозд, регионы хицауады уæнгтæ æмæ æхсæнады минæвæрттæ.
Ихын галуан апарахат 32 мин квадратон метрыл. «Тагбан» у инвестицион проект. Аразын æй райдыдтой 3 азы размæ. Аренæйы ис дыууæ ихы: сæйраг æмæ чысыл тренировкæгæнæн. Хоккей кæнæ къахкъæлæттыл аив бырыны спорты хуызты чи архайы, уыдонæн дзы сарæзтой æпппæт нырыккон уавæртæ. Уыимæ ма спортивон залтæ, уæлæдарæс ивæн агъуыстытæ, уазджыты зонæ, хостел 36 адæймагæн.
Мадзал аразджытæ бацæттæ кодтой егъау æмæ ирд бæрæгбон. Мариинаг театры Цæгат Ирыстоны филиалы сæйраг балетмейстер Суанты Валерий уазджыты дисы бафтыдта сывæллæттимæ цы программæ бацæттæ кодта, уымæй. Регионы сæргълæууæг Сергей Меняло æмæ хъуыстгонд тренер Вячеслав Фетисов фæсидтысты республикæйы цæрджытæм.
