Мария Иежица ӕмӕ Екатерина Мурашко фыццаг хатт сты Ирыстоны. Чызджытӕ æрцыдысты Малайзийӕ ӕмӕ Беларусийӕ нӕ адӕмы культурӕ ӕмӕ традицитӕ базонынмӕ. Сӕ бӕллиц у ам Дзӕуджыхъӕуы ахуыр кӕнын. Ӕмӕ сын проект “Ӕгас цу, Уӕрӕсе!” дӕтты ахӕм фадат.
Проект “Ӕгас цу, Уӕрӕсе!” æрбамбырд кодта 45 адӕймаджы 14 бæстæйæ. Азербайджан, Сомих, Белорусси, Мысыр, Кыргызстан, Малайзи, Туркменистан, Тунис, Франци — географи цӕсты ахады. Алыхуызон сфӕлдыстадон ӕмӕ интеллектуалон конкурсты уӕлахиздзаутæ æрцыдысты Кавказы хъӕздыг истори базоныны тыххæй.
Ӕдӕппӕт балц ахаста 7 боны. Йæ аразджытæ сæ мидисджын ахуырадон ӕмӕ культурон программӕ баххӕст кодтой цымыдисаг дæсныйад æвдисæг ахуыртæй. Фæсарæйнаг фæсивæд базыдтой ирон кӕфтытӕ ӕмӕ ӕрмгуыст, стӕй ирон хӕринӕгтӕ кæнын. Уазджыты зæрдæмæ уæлдай тынг фæцыдысты нæ хӕхтӕ æмӕ, кӕй зӕгъын ӕй хъӕуы, Дзӕуджыхъӕу.
Проект “Ӕгас цу, Уӕрӕсе!”-йы нысан — иннӕ бӕстӕтимӕ ахастдзинӕдтӕ фӕхуыздӕр кӕнын. Цӕгат Ирыстон дзы архайы ныр ӕртыккаг аз. Æххæст æй кæнынц Национ политикӕ ӕмӕ ӕддагон бастдзинӕдты министрады æххуысæй.
