Конкурс «Иры Фидæн»-ы муниципалон къæпхæн райдыдта. Ирон фысджыты уацмыстæ, æмдзæвгæтæ æмæ сценикон нывтæ адæмы размæ рахастой Дзæуджыхъæуы сывæллæтты рæвдауæндæтты хъомылгæнинæгтæ. Æркастмæ сæхи бæрнонæй бацæттæ кодтой. Сабитæ иууылдæр уыдысты аив æмæ ирд уæлæдарæсы. Аргъ сын кодтой фæлтæрдджын жюрийы уæнгтæ – культурæйы æмæ аивады архайджытæ. Æвзонг курдиæттимæ базонгæ нæ уацхæссæг Саулаты Аланæ дæр.
Ирд декорацитæ, цымыдисаг костюмтæ æмæ рæсугъд аив дзырд. Сабитæ сæ уæндон къахдзæфтæй зæрдæтæ балхæдтой. Кæд мидæгæй тыхстысты æмæ сценæмæ фыццаг хатт рацыдысты, уæддæр хорз арæхстдзинад равдыстой. Сæхиуыл абарстой алыхуызон сурæттæ æмæ аив кæфытытæ.
Конкурс “Иры фидæны” муниципалон къæпхæны Цæгат-Ныгуылæн районæй архайынц сывæллæтты 16 рæвдауæндоны минæвæрттæ. Æвзонг артисттæ аив бакастысты æмдзæвгæтæ, акодтой зарджытæ, равдыстой скъуыддзæгтæ — алцыдæр ирон æвзагыл. Æнахъомтæ сфæлдыстадон архайды фæрцы зонгæ кæнынц культурæимæ, æгъдæуттимæ.
Дзæуджыхъæуы 59-æм рæвдауæндоны хистæр æмæ астæуккаг къордты хъомылгæнинæгтæ æркастмæ бацæттæ кодтой равдыст “Афæдзы афонты быцæу”. Равдыстой сын сæ хицæндзинæдтæ. Ахуыргæнæндоны мадæлон æвзагмæ стыр æргом здахынц, ис дзы полилингвалон кълæстæ. Хъомылгæнджытæ сæ куысты пайда кæнынц алыхуызон фæрæзтæй.
Сывæллæтты арæхстдзинадæн аргъ кодтой жюрийы уæнгтæ. Се ‘хсæн ирон æвзаг æмæ литературæйы ахуыргæнджытæ, Цæгат Ирыстоны педагогон колледжы ахуыргæнджытæ, рæвдауæндæтты разамонджытæ Дзæуджыхъæуы администрацийы специалисттæ æмæ ныййарджытæ. Уæлахиздзаутæ дарддæр архайдзысты конкурсы республикон къæпхæны.
