Дзæуджыхъæуы схорзæхджын кодтой Æпæтуæрæсеон конкурс «Мастер года»-йы регионалон къæпхæны уæлахиздзау æмæ призерты. Ерысы уæлахиздзау сси Цæгат Ирыстоны паддзахадон базарадон-экономикон колледжы ахуыргæнæг Цæболты Зæлинæ. Конкурс ацыд 25 апрелæй 25 майы онг. Бацархайдтой дзы 16 фæлтæрдджын ахуыргæнæджы.
Сæ куыстæн сын аргъ кодтой «Ворлдскиллс»-ы эксперттæ, Цæгат Ирыстоны ахуырады кусджыты педагогон фæлтæрддзинад уæлдæргæнæн республикон институты, ЦИПУ-йы, Хæххон-металлургон институты колледжы, Ахуырад æмæ наукæйы министрады æмæ куыстдæттæг организациты минæвæрттæ. Регионалон къæпхæны уæлахиздзау бацархайдзæн Æппæтуæрæсеон конкурс «Мастер года»-йы финалы. Ацæудзæн сентябры Екатеринбургы.
