Объекты æнæ фæлладуадзæн бонтæй кусынц 20 адæймаджы райсомы 9-æй изæры 6 сахатмæ. Сывæллæтты поликлиникæйы æртæуæладзыгон бæстыхай сарæзтой 1982-æм азы. Уæдæй бындуронæй цалцæг никуы уыд. Уыцы рæстæгмæ дзы бирæ аиуварсгæнинаг фарстатæ фæзынд. Æппæты æвзæдæр уавæры уыд йæ цар.
Цалцæггæнæн куыстытæ дзы райдыдтой 20-æм мартъийы. Специалисттæ райхæлдтой зæронд хæйттæ. Æртыккæгæм уæладзыджы ногæй баивтой рудзгуытæ, ныртæккæ дзы къултæ сæрдынц. Уымæй уæлдай ма дзы ауагътой рухсдæттæн системæ, фæзынд дзы интернет. Дарддæр сæмраст кæндзысты пъол, сæвæрдзысты кафель, саив кæндзысты къултæ. Къуылымпыдзинæдтимæ дæр сæмбæлдысты.
Фæткмæ гæсгæ объект хъуамæ радтой 2025-æм азы апрелы. Фæлæ куыстытæ æххæстгонд цæуынц æмгъуыдæй раздæр. Афтæмæй, ноггонд поликлиникæ чысыл пациентты исын райдайдзæн ацы азы кæрон.
Цалынмæ поликлиникæйы цалцæггæнæн кустытæ цæуынц, уæдмæ уал дохтыртæ рæстæгмæ æрбынат кодтой Хæххон-металлургон институты æмдзæрæны. Кусынц раздæры фæткмæ гæсгæ. Педиатртæ, невролог, хирург, ортопед, УЗИ-йы специалисттæ алкæддæр цæттæ стæ æмбæлгæ æххуыс бакæнынмæ.
Поликлиникæ сног кæндзысты “Здравоохранение” национ проекты фæлгæты. Æрмæст ивгъуыд аз республикæйы сарæзтой æмæ сцалцæг кодтой 5 дзæбæхгæнæндоны, ацы аз фæнд кæнынц ноджы иу объект рацаразын.
