Вероника Терещенкойы куыстыты аргуъантæ æмæ мæзджыттæ кæрæдзийы фарсмæ лæууынц. Кæттагыл нывгæнæджы фæндыд Дзæуджыхъæуы культурон хъæздыгдзинад равдисын.
Ирд палитрæ хуымæтæджы нæ равзæрста. Ахорæнты фæрцы чызг равдыста культурæты хъæздыгдзинад. Композици æххæст кæны Мады Майрæм – нывы сæйраг сурæт. Дзуæрттæ æмæ æрдæг мæйтæ – куыд адæмы æмæ динты иудзинад – уый та абон уæлдай ахсджиаг у, зæгъы Вероникæ. Ахæм хъуыдыимæ нывгæнæг сфæнд кодта æркасты архайын. Зæгъы, фыццаг призты фонды тыххæй зонгæ дæр нæ кодта, сæйрагдæр ын уыд йæ зондахаст фæхæццæ кæнын.
Кæркуысты Маринæйы кæттагыл та ахорæнтæ бирæ нæй, куыст графикæйы хуызы конд у. Нывыл æвдыст цæуы фидæны сахар. Бæстыхæйтты цымыдисаг формæтæ кæрæдзиимæ баст сты, уый сæ диссагдæр кæны. Маринæ йыл куыста цалдæр къуырийы, ныр та йæ цæттæ кæны æркасты равдисынмæ. Алæмæты горæт скодта Марианна Блохина дæр.
Уалдзыгон ахорæнтæй нывгæнæг фæнд кодта ирдæй æмæ цымыдисагæй Дзæуджыхъæу равдисын. Афтæ – аив æмæ хъæздыг историимæ йæ райгуырæн сахар уыны Марианнæ. Зонгæ бынæттæ æрбацæуджытæ фендзысты ног хуызы. Архитектурæйы афæдзы фæлгæты 24 апрелы Сабырдзинады проспекты байгом уыдзæн равдыст, кæй бафæнда, уыдонæн сæ бон уыдзæн æркасты уæлахиздзауы равзарын. Экспозицийы æвдыст æрцæудзæн 40 хуыздæр куысты, хатдзæгтæ сбæрæг уыдзысты 29 июны.
