— Ныртæккæ цæттæ кæнын халсарты салат. Технологимæ гæсгæ алцы дæр хъæуы барын, цæмæй хæрдзтæ æфтиагæй фылдæр ма уой”.
Цыбыр рæстæгмæ халсарты салат цæттæ. Богдан Кравченко у уазал хæринæгтæгты цехы кусæг. Ацы дæсныйад уыд йæ бæллиц
æмæ 9-æм къласы фæстæ бацыд базарадон-экономикон колледжмæ. Ныр ахуыр дæр кæны æмæ кусгæ дæр. Фыццаг курсы фæстæ бафыста бадзырд.
— Æмбарынæй, колледжы ахуыр куы фæуон, уæд мæ куыст агурын нал хъæудзæн. Зонын йæ ам мæм æнхъæлмæ кæсдзысты, ам уыдзæн мæ куыст.
Ахæм бадзырд бафыста колледжы 2-æм курсы ахуырдзау Дудайты Максим дæр. Кафейы кусы 5 азы. Райдыдта насхафæгæй æмæ ныр та кæны хъарм æмæ уазал хæринæгтæ. 5 минуты — æмæ пиццæ цæттæ. Цæгат Ирыстоны паддзахадон базарадон-экономикон факультетмæ кæй бацыд, ууыл иу уысым дæр нæ фæсмон кæны.
— Колледжы стыр æргом здæхт цæуы практикон зонындзинæтæм, æмæ теоретикон ахуырты рæстæг фыст цæуы бадзырд, йæ фæрцы студентæн вæйы куысты бынат ахуыры фæстæ дæр.
Хæринаггæнджытæ, официанттæ, барментæ, административон куысджытæ — сезонмæ кафейы хъæуы 100 специалисты бæрц. Нысанмæ арæзт ахуырты фæрцы фарста лыггонд цæуы. Фæстаг рæстæг базарадон-экономикон колледжы 5 студентæн ис куысты бынат. Уæвгæ та, зæгъæм æрмæст куыстуаты фæллой кæны ацы ахуыргæнæндоны 30 студенты æмæ рауагъдоны.
— Æз кусын баристæ æмæ барменæй. Мæ куыст мæ зæрдæмæ цæуы, афоныл исын мызд. Кæимæ кусын, уыдон дæр мæ зæрдæмæ цæуынц.
2023-æм азы Цæгат Ирыстоны паддзахадон базарадон-экономикон колледж райста грант “Профессионалитет”. Йæ бындур у сæрмагонд куыстуатимæ баныхас кæнын, уым студентæн ратдзысты куыст. Абон нысанмæ ахуыр у ахсджиаг фарста, зæгъы колледжы директор Æбиты Валерий.
Киситы Светланæ 2 азы кусы бухгалтерæй. 3-æм курсы базыдта проект “Профессионалитет”ы тыххæй æмæ йæ фæрцы йæ бон сси куыст ссарын.
— Профессионалитет цы нысан кæны? Цæмæй ахуыры фæстæ студентæн бæрæггонд уа йæ куыст. Æмæ уый æз банымадтон тынг хорз хъуыддагыл, ома ахуыр фæуыдзынæн æмæ мæ дæсныйадмæ гæсгæ мын куыст уыдзæн. Сфæнд кодтон бафæлварын æмæ 2023-æм азы майы ардæм æрбацыдтæн”
Фыццæгтимæ студенты ном райсын, уый у нысанмæ арæзт ахуырады сæйраг ивддзинад. Фæлæ æнæмæнг бадзырд сфидар кæнын хъæуы платформæ “Работа России”-йы, уым лæвæрд цæуынц куысты бынæттæ дæр.
— “Работа России” баиу кодта куыстдæттæг организацитæ, административон кусджыты, бизнесс æмæ ахуыргæнæндæттæ. Фæллойгæнджытæ кæй хъæуы, уыдон сеппæт дæр сæ курдиаттæ дæттынц ацы платформæмæ. Æмæ алы æрыгон адæймагæн, кæцы цæуы астæуыккаг æмæ уæлдæр ахуыргæнæндонмæ, йæ бон у спайда кæнын æмæ бафыссын бадзырд, ахуыры фæстæ кæм кусдзæн, уыцы кусæндонимæ.
Компаниты зæрдæмæ цæуы ахæм хуызы æмархайд. Ныы онг платформæ “Работа России”-мæ 300 егъау куыстуатæй фылдæр балæвæрдтой курдиатæ. Уæдæ студенттæн дæр хорз, ахуыры фæстæ æппын къадæр 3 азы кæм бакусой, уый уыдзæн.
