Дзæуджыхъæуы цæуы республикæйы чемпионат панкратионæй. Хъæбысхæсты ацы хуыз дунейы рагондæртæй иу у. Ерысты цыдмæ цымыдисæй кастысты спортуарзджытæ. Архайджытæ равдыстой сæ цæттæдзинад. Дарддæр республикæйы номæй архайдзысты æппæтуæрæсеон ерысты. Финалмæ рацæуыныл тох кодтой æртæсæдæ адæймаджы. Турныры хатдзæгтæ нæ дарддæры æрмæджы.
Ацы спорты алы уысм дæр нымад у. Алы змæлд дæр нымад цæуы, уымæй арæзт у кæронбæттæн бæрæггæнæн дæр. Панкратион хъæбысхæсты рагондæр хуыз у. Джиоты Константиныл цæуы 14 азы. Ацы спорты хуызы йæхи фæлвары афæдз æмæ æрдæг. Тренировкæтæ кæны къуыри æртæ хатты клуб «Puncher»-ы. Спортсменæн йæхи арæхстджындæр нымайы ныхæй-ныхмæ æрлæугæйæ. Гауызмæ рацæугæйæ байдзаг вæййы алыхуызон æнкъарæнтæй.
Республикæйы чемпионаты лæппу йæхи тынг хорз равдыста. Йæ сæрæн архайды руаджы ныхмæллæуæгыл фæтых. Афтæмæй, йæхицæн фæндаг байгом кодта æппæтуæрæсеон ерысты архайынмæ. Æрыгон спортсменмæ рухс фидæн æнхъæлмæ кæсы. Стыр æххуыс ын сты йæ тренертæ. Лæппуйыл кусынц Ибрагим Гасанбеков æмæ Хъыбызты Юрий.
Ерысты архайдтой 320 лæппуйы æмæ чызджы республикæйы 19 клубæй. Æрæджы сæ тыхтæ бавзæрстой 8 азæй 15 азы онг сывæллæттæ. Дыккаг бон хуыздæр суæвыныл архайдтой 18 азы онг æмæ 20 азæй хистæр фæлтæр. Раззагдæртæ хорзæхджынгонд æрцыдысты кубоктæ, майдантæ æмæ Кады гæххæттытæй. Тренерты фæнысан кодтой бузныджы фыстæджытæй.
Афæдз нырма ныр райдыдта, фæлæ нæ спортсментæ цæттæ сты уæлахизтæм цæуынмæ. Хæстæгдæр кæнынц се стырдæр бæллицтæ.
