Кавказы 5-æм æппæтадæмон фестиваль «Мариинаг – Дзæуджыхъæу»-ы фæлгæты уыд Мариинаг театры симфонион оркестры концерт. Разамынд ын лæвæрдта маэстро Гергиты Валерий. Солисттæ – дунейыл зындгонд музыканттæ Павел Милюков æмæ Даниил Трифонов. Аивадуарзджытæ кадджын уазджытыл зæрдиагæй бацин кодтой. Æхсызгонæй сæм æнхъæлмæ кастысты. Бæлвырддæр нæ дарддæры æрмæджы.
Хъуысы Прокофьевы музыкæ. Скрипкæйæн оркестримæ йæ дыккаг концерт. Солист – Уæрæсейы æмæ æппæтадæмон конкурсты лауреат Павел Мюлюков. Дирежер – маэстро Гергиты Валерий.
Кавказы 5-æм æппæтадæмон фестиваль «Мариинаг – Дзæуджыхъæу» Цæгат Ирыстоны культурон мадзæлттæй у сæ цымыдисагдæр æмæ егъаудæр. Симфонион оркестры концерт программæйæн ахсы йæ иу хай. Концертмæ билеттæ уæй фесты цалдæр сахатмæ. Уый та ууыл дзурæг у, æмæ дзæуджыхъæуккаг аивадуарзджытæ Мариинаг театрмæ уазæгуаты зæрдиагæй кæй фенхъæлмæ кæсынц.
С имфонион оркестры концертты никуыма уыдтæн. Сæрмагондæй ссыдтæн Мæскуыйæ. Мæскуыйы мæ къухы нæ бафты концертмæ бахауын. Ныртæккæ мæ зæрдæ алыхуызон æнкъарæнтæй байдзаг. Фадат мын фæци фенын, фехъусын, базонын маэстро Гергиты Валерийы.
Мариинаг театры солисттæ зындгонд сты æгас дунейыл. Музыканттæ Павел Милюков æмæ Даниил Трифонов Дзæуджыхъæуы фыццаг хатт не сты. Куыд зæгъынц, афтæмæй аивадуарзджытæ оркестрæн стыр аргъ скæнынц.
«Мариинаг-Дзæуджыхъæу»-æн йæ дыккаг бон у. Разæй нырма бирæ цымыдисаг мадзæлттæ. Аивадуарзджытæм æнхъæлмæ кæсы хъæздыг программæ. Фестивалы фæлгæты æрмæст симфонион концерттæ нæ уыдзæн, фæлæ ма оперон спектакльтæ. Артисттæ сæрмагонд программæ бацæттæ кодтой сывæллæттæн дæр. Фестиваль «Мариинаг – Дзæуджыхъæу» фæуыдзæн 10 октябры. Аивадуарзджытæ фендзысты балеты стыр гала-концерт.
