Цæгат Ирыстоны хицауады сæрдар Дзанайты Барис æмæ Уæрæсейы экономикон райæзты министры хæдивæг Татьяна Илюшкина дзырдтой чысыл æмæ рæстæмбис амалхъомадæн æххуысы мадзæлттыл. Сæйраг фарста — республикæйы архайд сæрмагонд программæты фæуæрæхдæр кæнын. Ахæм хæс бæрнон кусджыты размæ æвæры регионы разамонæг Сергей Меняйло.
Татьяна Илюшкинайы ныхæстæм гæсгæ, регионæн «Чысыл æмæ рæстæмбис амалхъомады» национ проекты хорз бæрæггæнæнтæ ис. Сæрмагондæй райсæн ис центр «Мой бизнес» -ы куыст. Центры бавæрæн бизнесы рæзтмæ у ахадгæ. «Мой бизнес» -ы 8 муниципалон дæлхайадмæ ма тагъд рæстæджы бафтдзæн иу офис. Байгом æй кæндзысты Дзæуджыхъæуы администрацийы. «Ахсджиаг у нæ бæстæйы экономикæйы министрадимæ æмгуыст кæнын», — фæнысан кодта Дзанайты Барис. Йæ хъуыдымæ гæсгæ, къабазы рæзты тыххæй пайда кæнын хъæуы æппæт фадæттæй дæр.
