Респуликæйы цæрджытæй се ‘нæниздзинад хъыгдæрд кæмæн у, уыдонæн æмбæлгæ уавæртæ аразыны фарстатыл ныхас цыд сæ хъуыддæгты фæдыл Советы æмбырды. Амыдта йæ Дзанайты Барис. Ацы азы 11 мæймæ адæмæн куыстдæттыны республикон службæйы специалисттæ бацархайдтой 5 мин адæймагимæ, се ‘нæниздзинад цудыд кæмæн у, ахæмтимæ. Уыдонæй куыстагур бацыдысты 650 адæймаджы. Профориентацион лæггæдтæ та бакодтой 573 адæймагӕн.
Ахуырады къабазы кой куы кæнæм, уæд профессионалон дæсныйады чемпионат «Абилимпикс»-ы цудыд æнæниздзинадимæ фæсивæд, куыд студенттæ, афтæ скъоладзаутæ дæр, æнтыстджынæй архайынц. Ам компетенциты нымæц фæфылдæр кодтой 2 хатты æмæ ныр сты 12. Ацы аз дзы бацархайдтой 76 адæймаджы.
