Хъæлдзæг, комкоммæдзураг Цола. Цасфæнды рæстæг куы рацæуы, уæддæр та йæ цыргъ ӕмӕ кӕрдаг зондæй аивадуарзджы зæрдæ йæхимæ раздахы. Дзыкъуылайыл сагъæсгæнæг хуымæтæг ирон лæппу ацы хатт — хуымæллæггаг хæдахуыр артист. Йæ хъайтары миддуне йæхи уды скондмæ ‘ввахс у, уый бæрæг у.
“Драмон спектаклы” чысыл формæты номинацийы бронзæ аластой сæхимæ театр “Нæртон”-ы æвзонг артисттæ. Мæнæ ацы “гыццыл мыстытæ” та Цхинвалæй ссыдысты.
Гимназ “Альбион”-ы театралон къорды ахуыргæнинæгтæ фыццаг бынат бацахстой “Ирон аргъæутты” номинацийы. Хуссар Иры минæвæрттæ конкурсы архайынц ныр 4-æм аз. Къозонты Миланæ йæ фидæны дæсныйад нæма зоны, фæлæ, зæгъгæ, сценæ равзæрста, уæд æнтыстджын уыдзæн, — бафиппайдтой жюрийы уæнгтæ.
Сфæлдыстадон æркасты ацы аз хайад райстой мин адæймагæй фылдæр. Се ‘хсæн куыд коллективтæ, афтæ хицæн артисттæ дæр. 200 конкурсон номырæй фылдæр равдыстой. Фæсивæды галуанмæ финалмæ сæ хуыздæрты æрбахуыдтой. Фестиваль ныр фарæстæм хатт сарæзтой æмæ дзы иу хат чи бацархайы, уый та иннæ аз дæр æрбаздæхы.
Уал азмæ “Амыраны рухс”-ы архайджытæй бирæтæ равзæрстой сфæлдыстадон цардвæндаг. Ахуыр кæнынц аивадон здæхтытæм гæсгæ.
Уæлдай æхсызгон ирон зæрдæйæн уый у, æмæ æркасты æппæт дæр у нæхи, нæ мадæлон æвзагыл. Уый та ууыл дзурæг у, æмæ финалы архайæг 350 лæппу æмæ чызджы нæ фыдæлты ‘взагыл сæрибарæй дзурынц, хъуыды кæнынц, се ‘нкъарæнтæ æргом кæнын зонынц.
Уæлахиздзаутæ æмæ призерты схорзæхджын кодтой кады гæххæттытæй. Иннæ аз фестивальмæ ссæудзысты Лабæйы фæсивæд дæр.
