Хахнывтæй суанг хӕдзары проект саразыны онг — алцæмæ рæвдз. Фидӕны специалисттӕ сӕ арӕхстдзинад равдыстой Арæзтадон техникумы фæзуатыл. Кусæг дæсныйæдтæ кæй цымыдис кæнынц, сæрмагондæй уыцы фæсивæдæн расидтысты чемпионат “Профессионалтӕ-2026”. Йæ фæлгæты колледжтæ ӕмӕ техникумты студентты цӕттӕдзинад уыцы иу рæстæг уынынц куыстдæтджытæ дæр. Бæлвырддæр нæ дарддæры æрмæджы.
Сæрмагонд домæнтæм гæсгæ архайд. Фæсивæд рæстæджы æмгъуыдмæ æвдисынц æрмæст сæ зонындзинæдтæ нæ фæлæ ма сæ практикон цæттæдзинад дæр. Æфсæнкаркасы монтаж райдайы бындуры, зæххы хайы арæнтæ сбæлвырд кæнынæй. Алы миллиметр дæр хъæуы нымайын. Бæрæггæнæнтæм цæст дарын, къуымтæ раст кæнын, бæлвырд геометри – фидар конструкцийы бындур. Ам фидæны специалисттæ æмбырд кæнынц зын модультæ гипсокартонæй, ахизæнтæ алыхуызон фигурæтимæ, æвæрынц гæрæнтæ, алы фезмæлд дæр бæстон æмæ æххæст. Иу блок сæмбырд кæнынæн лæвæрд цæуы 4 сахатмæ хæстæг. Дарддæры къæпхæнтæ – сæрдын, декоративон къулсæрст æмæ кæронбæттæны сфæлдыстадон хай. Ацы хатт нывы темæ – “Фæллойадон сгуыхтдзинад”
Нæхи дыууæ къуырийы цæттæ кодтам. Æркаст ацы аз зындæр рауад. Уымæн æмæ фæфылдæр ис куыстыты гуырахст, уыимæ ма нын фаронимæ абаргæйæ къаддæр рæстæг лæвæрд цæуы.
Архитектурæйы аудиторийы дæр куыст йæ тæмæны бацыд. Ацы азы бакуысты – хи хæдзары рацарæзт. Архайджытæ цæттæ кæнынц проектон документацийы 8 модулы: архитектурон хуызæй зæххы хайы нывæстады онг. Уыдон æрмæст аив эскизтæ не сты, фæлæ техникон хуызы зын æмæ бирæвæрсыг архайд. Ам ахсджиаг креативон хъæппæристæ, инженерон бæлвырддзинад æмæ тыгъдады гæнæнтæ хъæуы æххæстæй сбæлвырд кæнын.
Чемпионатæй 10 боны раздæр сæ базонгæ кодтам хæслæвæрдтимæ. Уый бындурыл скодтой горæты арæзтæдты анализ. Æмæ ныр чемпионаты фæзтыл ныридæгæн æртæ боны цæттæ кæнынц архитектурон хахнывтæ.
Мæнмæ архайд зын нæ кæсы, уымæн æмæ программировани хорз зонын, уыимæ ма хахнывтæ кæнынмæ дæр рæвдз дæн. Алцыдæр мын æнцонæй уайы. Фæлæ уæддæр тыхсын. Чемпионаты мæ фæнды рамбулын.
Чемпионат «Профессионалы-2026» æрбангом кодта студентты, скъоладзауты, ахуыргæнджыты æмæ куыстуæтты минæвæртты, уыдон агурынц æрыгон æмæ зонаг специалистты. Арæзтады къабаз ныртæккæ æнтыстджынæй рæзы, фæлæ куысты хъомысæй уæлдай фылдæр кæны квалификациимæ кадрты цухдзинад. Ахæм фæзтæ та æххуыс сты курдиатджын фæсивæд ссарынæн, арæзтадон дæсныйæдты кад фæуæлдæр кæнынæн æмæ регионы кадрты резерв баххæст кæнынæн.
Кусæг дæсныйæдты кадртæй республикæ цух ййафы. Уый фæдыл арæзтады министрад йæ бæрны бакодта кусæндон – арæзтадон техникум. Ныфс нæ ис иумæйагæй кæй бацæттæ кæндзыстæм хорз специалистты æмæ студенттæн ахуыры фæстæ сæ бон уыдзæн нæ республикæйы куысты нылæууын.
Ерыстæ цæуынц республикæйы 15 фæзыл 55 компетенцимæ гæсгæ, федералон проект “Профессионалитет”-ы фæлгæты нацпроект “Фæсивæд æмæ сывæллæттæ” æххæст кæнгæйæ. Хатдзæгтæ сбæрæг уыдзысты 28-æм февралы, уæлахиздзаутæ та дарддæр Цæгат Ирыстоны номæй архайдзысты профессионалон дæсныдзинады æппæтуæрæсеон чемпионаты.
