Ам ахорæнты хуызтæ баиу вæййынц классикон музыкæимæ. Традицитæ ног гæнæнтимæ. Сывæллæттæ зонгæ кæнынц композицийы, нывкæнынады æмæ графикæйы академион домæнтимæ. Алексейы бæллиц у архитектор суæвын. Аивæдты скъолайы архайы 4 азы. Æркастыты æппынæдзух архайы.
Лæппу ныв кæнын райдыдта курдиатджын педагогты разамындæй. Аланæйы ныхасмæ гæсгæ, аивад у йæ царды нысан. Ацы архайдыл фæцалх сабийæ, уæд йæхæдæг дæр академийы ахуыргæнинаг уыд. Университет каст куы фæцис, уæд фæстæмæ раздæхт йæ сфæлдыстадон фæндаг кæцæй райдыдта, уырдæм. Ныр йæ фæлтæрддзинадæй хай кæны кæстæртимæ.
Джиджойты Аланæйыл æрмæст 24 азы цæуы. “Мæ ахуырдзаутæ – аивады мæ фидæн сты», зæгъы чызг. Æрыгон æмæ курдиатджын педагог йæ размæ æвæрд нысантæ æнтыстджынæй æххæст кæны. Йæ урокты дисциплинæ æмдзу кæны сфæлдыстадон архайдимæ. Хæстæгдæр рæстæг нывгæнæг фæнд кæны йæхи æрмадз байгом кæнын.
Академийы ирддæр хайæдтæй иу – адæмон инструментты секци. Йæ дирежер та у Темырты Алинæ.
Кæд ыл 25 азы цæуы, уæддæр æххæст у фæлтæрдджын ахуыргæнæджы миниуджытæй. Сывæллæттæ æхсызгонæй фæтагъд кæнынц йæ уроктæм. Ам сын фæхай кæны йæ арæхстдзинадæй, базонгæ сæ кæны традицион муыкæимæ æмæ йæ нырыккон фæзилæнтимæ. Алцыдæр 8 азы размæ райдыдта. Инструментыл архайынмæ йæ педагог куы сразæнгард кодта, уæд.
Алинæ разамынд цы хайадæн дæтты, уый алывæрсыг у. Скъола цал традицион инструменты хъахъхъæны, уый банымайын зын у.
Сæйраг здæхтыты бындуртæ базонынæн хъæуы дæсныйады агъоммæ цæттæдзинад æмæ къорд рæстæг. Ам ахуыры æмгъуыд у 5-æй 8 азы онг. Алцыдæр карæй кæнгæ у. Сывæллæтты фылдæр архайынц æркастыты, нæ республикæйы кад бахъахъхъæнынц æндæр регионты дæр. Афтæ Алинæйы хъомылгæнинæгтæ æрæджы академийæн æрхастой ног уæлахизтæ.
Æрыдоны аивæдты скъолайы традицитæ æнгом цæуынц ног гæнæнтимæ. Ам æрыгон педагогтæ архайынц сывæллæтты курдиат раргом кæныныл, цæмæй сæхи фæлварой æмæ ногдзинæдтæм тырной.
