Инженер у фидæны дæсныйад. Ахæм номимæ проект сывæллæттæ æмæ студенттæн аразынц нæ республикæйы. Йæ сæйраг хæс у фæсивæды ацы дæсныйадмæ сцымыдис кæнын. Проект аразджытæ сты нæ республикæйы Æхсæнадон палатæ, Цæгат Ирыстоны паддзахадон университет æмæ регионалон куыстуæттæ. Ацы хатт Алагиры 5-æм скъолайы ахуырдзаутæн сарæзтой тематикон экскурси. Семæ уыдысты не сфæлдыстадон къорды уæнгтæ дæр.
Барæн прибортæ, микроскоптæ, роботтæ – канд уыдон нæ, фæлæ ма хойраджы куыстад æмæ минералты хъæздыг коллекци федтой сæхи цæстæй Алагиры скъолайы ахуырдзаутæ. Сарæзтой сын экскурси Цæгат Ирыстоны паддзахадон университеты факультетты. Уый фæстæ ахуырдзаутæ араст сты наукон-инновацион куыстуат “Баспик”-мæ. Уый у, микроканалон пластинæтæ чи уадзы, ахæм иунæг кыстуат Уæрæсейы. Хъæуынц æхсæвыгон уыныны прибортæ аразынæн. Скъоладзаутæм тынг цымыдисаг фæкаст куыстуат.
Æхсæнадон палатæ регионалон куыстуæттимæ аразы республикæйы скъоладзаутæн проект «Инженер – профессия будущего», зæгъгæ. Программæйы куратор æмæ «Баспик»-ы сæйраг инженер Виталий Савенко йæхæдæг равдыста æмæ радзырдта скъоладзаутæн куыстуаты тыххæй. Базонгæ сæ кодта компанийы историимæ æмæ сын равдыста куыстады фæтк. Виталий дызæрдыг нæ кæны, ахæм программæтæ хъæугæ кæй сты, ууыл. Се руаджы æрыгæттæ базонгæ вæййынц инженеры дæсныйадимæ.
Виталий Савенко, наукон-технологон центр «Баспик»-ы сæйраг инженер: «Нæ зæрдæ дарæм, нæ республикæ Уæрæсейы электрон промышленносты къабазы раззагдæрты `хсæн кæй уыдзæн, ууыл. Тынг æхсызгон нын у, сывæллæттæ æмæ нæм студенттæ кæй рбацыдысты. Федтой, цы куыст кæнæм, уый. Æнцон нæу. Продукци уадзæм къæпхæнгай. У хæрзхъæд æмæ фæразон, уымæн æмæ дзы пайда кæнынц æфсæддон техникæйы».
Дзæуджыхъæуккаг технологон центр Баспик кусын райдыдта 1991-æм азы. Уæд къорд ахуыргæндты размæ лæууыд сæрмагонд хæс – сæ дæсныйад æмæ зонындзинæдты руаджы микроканалон пластинæты рауагъдад рапарахат кæнын. Сæ фæнд сæ къуХы бафтыд. Æнтыстджынæй. Уæрæсейы компани сси раззагдæр ацы къабазы. Цы сын бантыст, ууыл нæ ныллæудзысты. Куыстуат фæнд кæны ног специалистты ссарын. Стæй ма кусы ног проектыл дæр. Баст у оптикон пластинæтæ уадзынимæ. Проект аразджытæ сæ зæрдæ дарынц, республикæйы рæзты стратегимæ кæй бахаудзæн сæ программæ, ууыл. Зæгъын хъæуы уый, æмæ йæ фыццаг дыууæ æркасты республикон парламент ныридæгæн сфидар кодта. Экскурсийы фæстæ скъоладзаутæ араст сты республикæйы промышленность æмæ транспорты министрадмæ. Уым сæ схорзæхджын кодтой проекты архайджыты сертификаттæ æмæ ног азы лæвæрттæй. Радтой сын сæ Цæгат Ирыстоны промышленность æмæ транспорты министры хæдивæг Мадзаты Эль брус æмæ республикæйы Æхсæнадон палатæйы сæрдар Нина Чиплакова. Уыдон сæхæдæг дæр каст фесты инженерон-техникон факультеттæ.
Проект аразджытæ дызæрдыг нæ кæнынц, æрыгон адæймаг инженеры дæсныйад куы равзара, уæд йæ фидæн цымыдисаг кæй уыдзæн, ууыл. Уæд сын куыст алкæддæр уыдзæн. Ацы дæсныйад ис тæккæ хъæугæдæрты `хсæн.
Биджелты Бертæ
