Фидæныл хъуыдыимæ

Битарты Вячеславы разамындæй абон хицауады хæдзары уыд ирон æвзаг бахъахъхъæныны фарстаты фæдыл къамисы æмбырд. Ныхас дзы кодтой 2018-2020 азты «Ирон адæмы национ-культурон рæзт»-ы Паддзахадон программæ æххæст кæныныл. Ахуырад æмæ наукæйы министр Азымты Иринæ куыд фехъусын кодта, афтæмæй нæ республикæйы скъолаты æмæ рæвдауæндæтты хъуамæ ахуыр кæной полилингвалон системæйы бындурыл. Цæгат Ирыстоны Паддзахадон университеты кусджыты хъуыдымæ гæсгæ ма журналистикæйы факультеты хъæуы, ирон æвзагыл чи фыссы, ахæм уацхæсджыты цæттæ кæнын. Сусæггаг нæу, дзыллон информацион фæрæзты иронау чи фыссы, ахæм специалисттæ фаг нæй. Æмбырды ма æрныхас кодтой географион объектты номхыгъдыл. Бахастой фæндон Цæгат Ирыстоны фæндаггон нысантæ æмæ амонæнтæ паддзахадон æвзæгтыл фыссыны тыххæй. Дæнцæгæн æрхастой фæсарæйнæг бæстæтæ. Туристтæн ахæм амонæнтæ кæддæриддæр пайда вæййынц.