Цины цæссыгтæ æмæ сæрыстырдзинады æнкъарæнтæ. Абон Алагиры сæрмагонд парад сарæзтой Фыдыбæстæйы Стыр хæсты ветеран Алексей Шевченкойæн. Уый хъæбатырæй тох кодта Советон Цæдис немыцаг фашисттæй ссæрибар кæныны тохты. Архайдта ма советон-япойнаг хæсты дæр.
Кæд Алексей Шевченкойыл 97 азы цæуы, уæддæр Уæлахизы зарæгмæ уайтагъд фæцæрдæгдæр вæййы. Фæткмæ гæсгæ, æвзонг лæппутæ æмæ чызджытæн æфсæддон æгъдау радта.
9 майы агъоммæ ветеранæн бузныг зæгъынмæ æрмæст Алагиры цæрджытæ не ‘рбацыдысты. Кадджын хистæрæн аккаг аргъ скодта республикæйы разамынд. Сергей Меняйлойы номæй ветеранæн арфæ ракодтой хицауады уæнгтæ.
Æфсæддон зарджытæ, æмдзæвгæтæ. Сæйрагдæр та бузныджы ныхæстæ. Ахæм хуызы срæсугъд кодтой бæрæгбон.
Адæмы зæрдæтæ алыхуызон æнкъарæнтæй уыдысты дзаг. Сæ цæссыгтæ та сты цины нысан – сæрыстыр сты сæ хистæрæй. Цин кæнынц, бузныг зæгъын ын сæ бон кæй у, ууыл.
Алексей Шевченко фронтмæ бахауд хæрзæрыгонæй. Архайдта Ленинград æрхъулайæ суæгъд кæнын тохы. Йæхи æвдыста æхсарджынæй. Фыдыбæстæйы Стыр хæст Алексей Шевченкойæн фæстаг нæ уыд. Архайдта советон-япойнаг хæсты дæр. Кæддæридæр тырныдта размæ, уæлахизмæ. Хæсты фæстæ йе фсымæримæ ссыд Кавказмæ. Афтæ бирæ бауарзта Цæгат Ирыстон æмæ ам баззад цæрынмæ.
Абон Алексей Шевченко цæры Алагиры. Йæ фарсмæ кæддæриддæр ис йæ цыппаркъахыг хæлар. Черныш раст цымæ йæ хицауы зæрдæйы рис зоны — æппынæдзух йæ разæй æддæмæ нæ хизы.
Калоты Дзерассæйы
