Фыдыбæстæйы Стыр хæсты номыл аллейæ байгом Хæххон паддзахадон аграрон универститеты административон корпусы раз. Уæлахизы Боны агъоммæ канадаг церцисы ссæдз талайы ныссагътой агрономон факультеты фыццагкурсонтæ. Ныр сæм бæстон зилдзысты. Бæлæстæ ивадсырх къуыбæрттæ ракалдзысты 9-æм маймæ.
Ацы зайæгой бирæ архайд нæ домы, фæлæ йæм хъæуы раст зилын. Зæгъæм, цæмæй дидинæг фæхæца, уый тыххæй йæ ныссадзыны фæстæ мæр хъæуы дзæбæх ныннæмын, донæй йæ бафсадын. Номарæн Аллейæ университеты раз скæныны хъæппæрис разынд æхсæз студентмæ. Иууылдæр сты Фыдыбæстæйы Стыр хæсты архайджыты кæстæртæ. Уæлдæр ахуыргæнæндоны ректор Гогаты Олег куыд радзырдта, афтæмæй университеты фæсивæды патриотон хъомыладмæ уæлдай æргом здахынц. Райгуырæн зæххмæ уарзондзинад æппынæдзух æвдисынц.
Ныртæккæ уæлдæр ахуыргæнæндоны 40 минæвары сты Сæрмагонд æфсæддон операцийы бынаты. 16-æй дзы фæмардысты. Фыдыбæстæйы хъæбатырты нымайын у ахуыргæнæндоны раззагдæр хæстæй иу.
