Афтæ, хæслæвæрдтæ нысан кæнгæйæ Ветеранты Советы райдайы Сабеты Викторы кусгæ бон. 10 азы æмгъуыдмæ куыстмæ иу хатт нæ байрæджы кодта. Дзæуджыхъæуы бирæ уарзы, уымæ гæсгæ рацæуы рагацау, цæмæй йæ уынгтыл ауайа. Уыимæ ма сыгъдæг уæлдæф æнæниздзинадæн у пайда.
Фашисттæ Дигорамæ куы æрбабырстой, уæд Сабеты Викторыл цыд 12 азы. Иу минут дæр фæстæдæр нæ фæлæууыд. Сырх æфсадæн æххуыс кæнынмæ ацыд.
12 аздзыд Виктор партизантæн хаста хæринаг æмæ хъæугæ дзауматæ.
Уый фæстæ 37-æм дивизийы архайгæйæ Стъараполы онг ныхæццæ. Уым къамандыгæнджытæ куы баззыдтой, лæппуйыл цас цæуы, уæд æй сфæнд кодтой фæстæмæ хæдзармæ арвитын. Сабеты Виктор куы сыздæхт, уæд йæхи ныффыста саперты курсытæм. 43-æм азæй фæстæмæ йæ райгуырæн районы рæмудзæн æрмæджыты агуырдта. Райста цæфтæ. Хæсты фæстæ архайдта адæмон хæдзарады райрæзтыл. Уыд партийы уæнг. Куыста Байконуры. Йæ хъæппæрисæй цалдæр горæты фæзынд спорты галуантæ æмæ стадионтæ.
1-æм сентябры Сабеты Викторыл сæххæст 90 азы. Ветераны ныхæстæм гæсгæ, æзтæ тагъд тæхынц, уымæ гæсгæ цин кæнын хъæуы алы боныл дæр.
Рæстуд уæвын æмæ райгуырæн зæххæн лæггад кæнын. Уыдон сты Сабеты Викторы сæйрагдæр домæнтæ. Уæд цæрын æмæ уарзын дæр æнцондæр у, зæгъы Ветеран.
