Фыранктæ Лео, Хостæ æмæ Лаурæ Цæгат Ирыстоны фæцахуыр сты. Ахуыргондтæ куыд фæнысан кодтой, афтæмæй ацы хъуыддаг æнтысджын рауад, уæдæ æрдзон уавæрты сæхи куыд дарынц, уый дæр сбæлвырд кодтой.
Уæ зæрдыл уын æрлæууын кæндзыстæм, июлы мæйы сырдты рауагътой Турмоны фæдзæхст бынаты, æмæ сæм æппынæдзух сæ хъус дарынц. Алы сырдыл дæр ис, сæ архайд сын спутникæй чи бæрæг кæны, ахæм хъуырбос. Фыранк Лео уæлвæзтæм схызт. Хостæ æмæ Лаурæ та сты донмæ хæстæг. Специалистты ныхæстæм гæсгæ, Леойæн цуан кæнын хуыздæр æнтысы. Фыццæгты сырдтæ цуан кодтой лыстæг сырдтыл. Иу цасдæры фæстæ сын сæгуыт æрцахсын дæр бантыст.
Зæгъын хъæуы уый дæр, æмæ Кавказы фыранкты мыггаг сног кæныныл архайы Уæрæсейы æрдзон æвæрæнты æмæ экологийы министрад.
