Сергей Меняйлойæн уыд кусгӕ фембæлд Цæгат Кавказы хæххон-металлургон институты ректоры хæстæ рæстæгмæ æххæстгæнæг Игорь Алексеевимæ. Æрдзырдтой зонадон архайд æмæ фæлтæрдджын кадртæ цæттæ кæныныл.
Ахуыргæнæндоны разамонæджы ныхæстæм гæсгæ, хæстæгдӕр рæстæг институты райдайдзæн кусын студентон поликлиникæ. Лæггад кæндзæн 5 мины бæрц студенттæ æмæ ахуыргæнджытæн. Дохтырты консультации, хъæугæ иртæстытæ æмæ профилактикон æркаст уыдзысты лæвар, — фæбæрæг кодта Игорь Алексеев.
Ныхас цыд уæлдæр ахуыргæнæндоны дарддæры пълæнттыл дæр. Ахсджиаг у Цъæйы спортивон-дзæбæхгæнæн лагеры райрæзт дæр. Æрвылаз дзы институты кусджытæ æмæ студенттæн вæййы фæлладуадзыны бар. Ныртæккæ хъæуы ссарын инвесторы æмæ йемæ æрдзы улæфæн бынæттæ саразыны иумæйаг проектыл бакусын, — загъта ректоры хæстæ æххæстгæнæг. Сергей Меняйло хъæппæрисимæ сразы. Фембæлды хатдзæгтæм гæсгæ, йæ архайджытæ дарддæры æмгуыстадыл баныхас кодтой.
