Фыццӕгӕм поликлиникӕйы кусы стресс-эхокардиографийы кабинет

Нæ равдыст райдайдзыстӕм ӕнӕниздзинадхъахъхъӕнынады райрӕзтӕй. Цӕгат Ирыстоны уӕрӕхдӕр кӕнынц зӕрдӕйы-тугдадзинты низтӕ бӕрӕг кӕныны гӕнӕнтӕ. Фыццæгæм поликлиникӕйы кусы стресс-эхокардиографийы ног кабинет. Нырыккон ифтонггарз рабӕрӕг кӕны ишемийы низ ӕмӕ ӕххуыс у дзӕбӕх кӕныны мадзæлттæ равзарынæн. Процедурӕ — дыууӕ къӕпхӕнӕй. Фыццаг скӕнынц ультразвукон иртасӕн ӕмӕ фӕнысан кӕнынц ӕппӕт бӕрӕггӕнӕнтӕ дӕр. Стӕй — уӕнгдыхӕй архайд. Уый фӕстӕ, дохтыр аргъ скӕны зӕрдӕйы куыстæн. Рабæрæг кæны, сæрзилæн фæзынд æви нæ. Специалистты ныхӕстӕм гӕсгӕ, низы миниуджытæ цас раздӕр рабӕрӕг уой, уыйас ӕнцондӕр у уӕззау фӕстиуджытӕй хи бахизын.