Йæ цардæй ахицæн номдзыд журналист Хестанты Победæ

Дзыллон информацион фæрæзты минæвæрттæ хъыг кæнынц не хсæнæй нæ уарзон хистæр, ирон журналистикæйы æмæ ирон ныхасы дæсны, Хестанты Победæ кæй фæхъуыд, уый фæдыл. Номдзыд журналисткæ райгуырд Зилгæйы 1945-æм азы, 9 майы Бутаты хæдзары æмæ йыл ном дæр сæвæрдтой – Победа. Сæ хъæуы астæуыккаг скъола каст куы фæци, уæд бацыд Цæгат Ирыстоны паддзахадон педагогон институтмæ, уырдыгæй та газет “Рæстдзинад”-мæ. Победæ 40 азы снывонд кодта Цæгат Ирыстоны радиойæн. Уыд уацхæссæг, редактор, тæлмацгæнæг, фæлæ ма уыцы рæстæг журналистикæйы сусæгдзинæдтæ амыдта кæстæр фæлтæрæн. Журналистикæйы факультеты студенттæн йæ куысæн уат уыд дæсныйады æрмадз. 2017 азы пенсийы куы рацыд, уæд та йæ цард снывонд кодта литературæйæн. Йæ уацмыстæ мыхуыры рацыдысты цалдæр чиныгæй. Стæлмац кодта дунейы зындгонд класикты дæр. Мадæлон æвзагæн лæггад кæнын нымадта йæ хæсыл æмæ йын царды фæстаг бонмæ нæ бафæллад лæггад кæнынæй. Хестанты-Бутаты Победæйæн фæстаг фæндараст зæгъдзысты 25 июлы.