133 ног лифты райдыдтой кусын нæ республикæйы. Уый тыххæй фехъусын кодта цæрæнуæтты-коммуналон, артаг æмæ энергетикæйы министрад. Бирæфатерон хæдзæртты капиталон рацарæзты программæмæ гæсгæ, Цæгат Ирыстоны хъуамæ баивой 166 лифты. Уый тыххæй радих кодтой 363 милуан сомæй фылдæр. Ныртæккæ бакуыстой программæйы фыццаг къæпхæныл. Фæлварæны хуызы сифтонг кодтой 117 уæлæмæисæны Дзæуджыхъæуы.
16 та Алагиры районы. Ног лифтытæ конд сты зынгфæразæг æрмæджытæй, ис дзы информацион дисплей. Суанг ма йæ кънопкæтыл ис Брайыльы шрифт дæр. Алы фезмæлд дæр нысан кæндзысты специалисттæ. Уыимæ ма сæрмагонд æркаст цæудзæн лифтыты цæттæдзинадмæ. Уæдæ цæрджытимæ дæр бастдзинад уыдзæн. Профилон министрады куыд фæбæрæг кодтой, афтæмæй сæрмагонд программæйы фыццаг къæпхæны фæткмæ гæсгæ лифтытæ нæ арæзтой. Кæм дæр ма рабæрæг кодтой къуылымпыдзинæдтæ. Уый тыххæй хъæугæ ныхас цæуы арæзтадон компаниимæ. Программæйы 2-аг къæпхæнмæ куы рахизой, уæд хъуамæ сифтонг кæной 33 лифты. Фæлæ кæронбæттæн уынаффæ нæма рахастой.
Бирæфатерон хæдзæртты капиталон рацарæзты фонды генералон директоры хæстæ æххæстгæнæг Ногайты Алан куыд загъта, афтæмæй ацы хъуыддаджы ахсджиаг сты бынæттон цæрджыты арæзтадон фиддонтæ. Ныртæккæ лифтытæ цы хæдзæртты раивтой, уым цæрджытæ бафыстой 10%. Фæлæ æндæр хæдзæртты та, нырма лифтытæ кæм нæ сывæрдтой, уым 1% йеддæмæ нæу бæрæггæнæн. Афтæмæй, дам, дарддæр программæйыл кусын зын уыдзæн.
