Арæх вæййы фехъусæн: ахуыргæнæджы куыст у зын, фæлæ арфæйаг. Хъуамæ зæрдæйæ уарза йӕ дæсныйад, фæндаг ссара ахуырдзаутæй алкæй зæрдæмæ дæр. Гуырын сæм кæна ныфс, æууæнк æмæ уарзондзинад, цæуыл сæ ахуыр кæны, уыцы хъуыддагмæ. Ахæм ахуыргæнæгыл банымайæн ис Гокъонаты Ларæйы. Сечеры скъолайы къæсæрæй бакъахдзæф кодта 52 азы размæ æмæ уæдæй абонмæ йæ зонындзинæдтæ æнæвгъауæй лæвар кæны сабитæн.
Биологийы наукæ цы у æмæ дзы куыд спайда кæнæн ис, уый Гокъонаты Ларæ кæддæриддæр æвдисы цымыдисаг хуызы. Алы скъоладзау дæр йæ урокты сæмбæлы диссаджы зонындзинæдтимӕ. Ахуыр кæнынц дун-дунейы фæлдисондты конд, сæ равзæрд, сæ бирæкæнынад æмæ сæ рæзт. Ахуыргæнинæгты наукæйы ног æмæ уӕлдӕр къæпхæнтæм схизын кæнын у Гокъолнаты Ларæйæн йæ сæйраг нысан. Сечеры скъолайы кусы ныр 52 азы дæргъы. Йæ предмет нымайы ахсджиагдæр æмæ цымыдисагдæртæй иуыл. Уымæн æмæ иртасы æрдз.
Гокъонаты Ларæ, Сечеры скъолайы биологийы ахуыргæнæг:
«Ног темæ бамбарын кæнæн ис куыд цæстуынгæ ахуырадон æрмæджытæй пайда кæнгæйæ, афтæ презентацитæ æмæ видеонывтæй пайдагæнæгæйæ дæр. Ныртæккæ гæнæнтæ бирæ фæуæрæхдæр сты».
Нырыккон технологитæ уроктыл сабиты ноджы тынгдæр сцымыдис кæнынц. Уый тыххæй сæ Гокъонаты Ларæ пайда кæны æппынæдзух. Æрвылбон — ног иртæстытæ, хатдзæгтæ. Биологийы гæнæнтæ сты æгæрон.
Соскъиты Фатимæ, Сечеры скъолайы 9-æм къласы ахуыргæнинаг:
«Тынг хорз ахуыргæнæг у. Алы ногдзинад дæр нын амоны бæстонæй. Арæх пайда кæнæм таблицæтæй. Нæхæдæр дæр саразæм проекттæ, докладтæ».Биазырты Элинæ, Сечеры скъолайы 9-æм къласы ахуыргæнинаг:
«Нæ ахуыргæнæджы урокты биологи тынг бауарзтон. Ныр мæ фæнды дохтыр суӕвын. Уыцы хъуыддаджы дæр мын æххуыс кæны. Æрвылбон мæ фæсурокты цæттæ кæны олимпиадæтæм, фæлварæнтæм».
Ахуыргæнæг сабиты æрмæст алыварс æрдзы сусæгдзинæдтимæ нæ зонгæ кæны, фæлæ сын амоны, ӕцӕг наукӕйы ног мадзӕлттӕй пайда кӕнынӕй кæй нæ хъæуы тæрсын. Æмӕ йын йӕ историмӕ куы ‘ркӕсай, уӕд фенæн ис, дзыллæйы къухы цы ӕнтыстытӕ бафтыд, уыдонӕй бирӕтӕ ӕнӕнхъӕлӕджы кӕй рауадысты.
Гокъонаты Ларæ, Сечеры скъолайы биологийы ахуыргæнæг:
«Сывæллæтты куы нæ уарзай, уæд скъолайæ иувæрсты цæуын хъæуы. Хъуамæ уарзай дæ дæсныйад. Мæнмæ уроктæ куы нæ вæййы, уæд мын зын вæййы. Сæрдыгон каникултæ куы вæййынц, уæд та скъола уæлдай тынг æрымысын. Уымæн æмæ æнæ сабитæй мæ бон нæу».Надгериты Джулеттæ, Сечеры скъолайы директор:
«Кæддæриддæр зæрдæргъæвд. Йæ дæсныйадыл æмæ скъоладзаутыл æнувыд. Ахуыргæнæджы ном Хуыцауæй лæвæрд кæмæн у, ахæм адæймаг у».
Гокъонаты Ларæ ахуыргæнæгæй кусын куы райдыдта, уæдæй нырмæ бирæ скъоладзауы сцымыдис кодта биологимæ. Йæ ахуырдзаутæй бирæтæ абон сты æнтыстджын дохтыртæ, фармацевттæ, ахуыргæнджытæ. Æрæджы Гокъонаты Ларæйы нæ республикæйы сæргълæууæг Сергей Меняйло схорзæхджын кодта «Цæгат Ирыстоны сгуыхт ахуыргæнæджы» номæй.
Гокъонаты Ларæ, Сечеры скъолайы биологийы ахуыргæнæг:
«Ахуыргæнæг суæвыны бæллиц мæм мæ сабибонтæй фæстæмæ ис. Ацы скъолайы ахуыр кодтон æмæ ацы скъоламæ æрбацыдтæн кусынмæ дæр. Æмæ дын дæ фæллойæн аргъ куы кæной, уæд, кæй зæгъын æй хъæуы, æхсызгон у».
Азтæ цæуынц, фæлæ Гокъонаты Ларæ фæллад нæ зоны. Уæрæсейы ахуырады сгуыхт кусæг йæхиуыл æнæауæрдгæйæ кусы ныртæккæ дæр. Ууыл дзурæг сты йæ ахуырдзауты бирæ æнтыстытæ æмæ иунæг фыст йæ фæллойадон чиныджы.
Дзæдзойты Фатимæ
