Тæбæхсæуты Балойы номыл ирон академион театр сси национ театрты фестивалы дыууæ номинацийы уæлахиздзау. Бацархайдтой дзы спектакль «Ромео æмæ Джульеттæ»-имæ. Сæвæрдта йæ, Уильям Шекспиры зындгонд трагедимæ гæсгæ, Уалыты Гиви. Фестивалы экспертон къамис æдæппæтæй æркастысты 15 спектаклмæ. «Ромео æмæ Джульеттæ» бахастой хуыздæрты хыгъдмæ.
Спектакль «Ромео æмæ Джульеттæ» бирæ æрыгон артисттæн байгом кодта фæндаг Ирон театры сценæмæ. XVI-æм æнусы Веронæйы цы цаутæ æрцыди, уыдон Уалыты Гиви рахаста нырыккон дугмӕ. Спектаклы руаджы йæ фæндыди фæсивæдимæ сæхи æвзагыл аныхас кæнын. Уымæн æмæ дзы цæуыл дзурынц, уыдон абон дæр сты ахсджиаг.
Шекспиры трагедийыл рæстæг нæ тых кæны. Абон дæр, 400 азæй фылдæр рацæугæйæ, адæмы зæрдæты æвзӕрын кæны арф æнкъарæнтæ. Æрæджы спектакть равдыстой Национ театрты æппæтадæмон фестивалы Дагестаны. Экспертон къамисы хатдзæгтæм гæсгæ, спектакль бахастой хуыздæр спектакльты хыгъдмæ.
Ромео – æрыгон актер Гуцаты Тамерлан. Джульеттæйы фæлгонц та раргом кодта Æгкацаты Аминæ. Сæ дыууæ дæр сты Цæгат Ирыстоны паддзахадон университеты аивæдты факультеты рауагъдонтæ. Артисттæ куыд зæгъынц, афтæмæй дзурынц æрмæст сæхи номæй нæ, фæлæ ма æгас æрыгон фæлтæры номæй. Сæхӕдӕг дӕр сты уацмысы хъайтарты кармæ хæстæг.
Ирон театр та кæддæриддæр йæ кадджын ном сæрыстырæй хæссы. 26 ноябры, æппæтадæмон театралон форум «Золотой витязь»-ы фæлгæты Мæскуыйы, Армен Джигарханяны театры равдисдзысты спектакль «Ричард III».
Дзæдзойты Фатимæ
