Гом арвы бын ног спортивон объект сырæздзæн ацы азы кæронмæ. Дигорайы цæрджытæ тагъд рæстæг ахæм хорзæхæй хайджын фæуыдзысты. Арæзтадон куыстытæ ныридæгæн цæуынц. Спортивон объекты арæзтад бантыст федералон проекты фæрцы. Объекты уыдзæн 100 бадæн бынаты, футбол, волейбол, воркаутæй хъазынæн фæзуæттæ æмæ æндæр цымыдисаг гæнæнтæ.
Афтæ Гусалты Владимир амоны, фидæны ацы проектмæ гæсгæ гом арвы бын цы спортивон объект сырæздзæн, уый. Ам куыстытæ райдыдтой 2 мæйы размæ. Фесивæдæн дзы фæзындзæн спортимæ æмхиц уæвынæн фылдæр гæнæнтæ.
Хъуыддаг саразын бантыст федералон программæ «Развитие спортивной инфраструктуры Северо-Кавказского федерального округа»-йы фæлгæты. Æмткъæй йын рахай кодтой 25 милуан соммæ ’ввахс, куыд федералон бюджетæй, афтæ республиконæй дæр. Æрвылбон бынæтты кусы 10 адæймагæй 15 адæймаджы онг. Куыстытæ иу бонмæ дæр не `рлæууынц. Дигорайы ацы объект кæд дыккаг у, уæддæр у тынг хъæугæ.
Дигорайы ацы спортивон объект ныр уыдзæн 2-аг. Афтæ ма 2018 азы январы Дигорайы байгом кодтой ног спортивон комплекс. Фæзынди дзы залтæ боксæй хæцынæн, уæгъдибар хъæбысхæстæн, атлетикæ æмæ спорты æндæр хуызтæн, суанг аэробикæйы онг. Футболæй хъазынмæ та дуармæ бацæттæ кодтой дыууæ фæзы. Ног спортивон комплекс арæзт у федералон программæмæ гæсгæ. Ууыл бахардз кодтой 137 милуан сомы. 98 дзы рахай кодтой федералон бюджетæй. Фæзы бæрц æдæппæттæй у 4 мин квадратон метрмæ ’ввхас. Проектмæ гæсгæ æххæст уыдзæн æмбæлгæ кусæнгæрзтæй. Куыстытæ фæнд кæнынц фæуын ацы азы кæронмæ.
Пелиты Сабинæ
