Цæгат Ирыстоны паддзахадон университеты бындурыл цы поликлиникæ кусы, уый пайда кæны ног технологон фæрæзтæй. Зæгъæм, æрæджы райдыдтой цæттæ кæнын дæндæгтæ дзæбæхгæнæн пастæ. Куыд нын радзырдтой, афтæмæй уый дæтты дзуапп медицинон къабазы æмбæлгæ домæнтæн. Ныры онг дзы пайда кæнынц поликлиникæйы пациентты фылдæр хай.
Дамбегты Астемырæн йæ дæндæгтæ рагæй риссынц. Цавæр низ ын у, уый йæ бон базонын нæ уыд. Нырттæккæ нæлгоймаг æрбцыд, Цæгат Ирыстоны паддзахадон университеты бындурыл цы поликлиникæ байгом, уырдæм. Йæхæдæг нын куыд радзырдта, афтæмæй ацы поликлиникæ æххæст у ног технологон фæрæзтæй. Ныфс æй ис, ацы бынаты æмбæлгæ æххуыс кæй райсдзæн, уый.
Цæгат Ирыстоны паддзахадон университеты бындурыл цы поликлиникæ кусы, уым ныртæккæ архайынц уæлдæр ахуырадон бынæтты ахуыргæндтæ æмæ студенттæ. Университеты стоматологи æмæ фармацийы факультеты рауагъдонтæ та дзы бæрзонддæр кæнынц сæ дæсныйад. Уыимæ ма пайда кæнынц ног гæнæнтæй дæр. Дæндæгты дохтыртæ рынчынæн йæ нихмæ гæсгæ дæр бацæттæ кæнынц сæрмагонд хос.
Дохтыртæ сæхæдæг рынчынтæн цы хос цæттæ кæнынц, уый хорз ахъаз у алы адæймагæн дæр. Дæндæгтæ дзæбæхгæнæн пастæ æххус кæны дзыхы мидæг цы æвзæр низтæ фæзыны, уыдонæн. Пайда дзы кæнынц, куыд профилактикон хос, афтæ дæр.
Поликликинæйы лабораторийы кусджытæ ныртæккæ архайынц ацы проект адæмы рæгъмæ рахæссыныл. Цæгат Ирыстоны паддзахадон университеты стоматологи æмæ фармацийы деканы хæдивæг Цæрахаты Ларисæ куыд бафиппайдта, афтæмæй ацы пастæйы сконды цы хостæй спайда кæнынц, удон стыр ахъаз сты адæймаджы æнæниздзинадæн.
Царахаты Ларисæ, Цæгат Ирыстоны паддзахадон университеты стоматологи æмæ фармацийы деканы хæдивæг: «Студенттæ æмæ ахуыргæнджыты хъæппæрисæй ныртæккæ бæстонæй кусæм дæндæгтæ дзæбæхæнæн пастæйыл. Бацархайдтам, цæмæй ацы дæндæгты пастæ ахъаз уа адæмы æнæниздзинадæн».
Ныртæккæ ацы поликлиникæмæ йæ бон у æрбацæуын алы адæймагæн дæр. Дохтыр æркæсдзæн рынчынмæ, цæмæй йын йæ æнæниздзинады уавæр бамбара, уый тыххæй. Чысыл фæстæдæр та ын рафысдзæн хостæ. Ныры онг уыцы æппæт лæггæдтæ сты лæвар.
Къутæрты Аидæ
