«Мариинаг-Дзæуджыхъæу» Æппæтадæмон Кавказаг фестиваль 3-аг хатт ацæудзæн Дзæуджыхъæуы. Республикæйы цæрджытæн уый у æхсызгон цау. Дзæуджыхъæуы аивадуарзджытæм æнхъæлмæ кæсы цымыдисаг фембæлд. Фестивалы фæлгæты Мариинаг театры зарæггæнджыты къорд акæндзæн адæмон æмæ уырыссаг классикæйы зарджытæ. Раздæрау оркестрæн разамынд дæтдзæн Гергиты Валерий. Фестиваль райдайдзæн 28-æм сентябры, цæудзæн 6-æм октябрмæ. Оперæ æмæ балетæй уæлдай, фестивалы уазджытæ фендзысты дæсныйад æвдисæг ахуыртæ дæр. Сæ курдиат дзы равдисдзысты Петр Чайковскийы номыл æппæтадæмон конкурсы лауреаттæ. Уæдæ дзы сывæллæттæн та сараздзысты цымыдисаг программæ. Фестиваль цæудзæн Мариинаг театры Дзæуджыхъæуы филиалы æмæ Цæгат Ирыстоны паддзахадон филармонийы. Мах дæр ацы æхсызгон цаумæ зæрдиагæй æнхъæлмæ кæсæм. Бæлвырддæр уын дзурдзыстæм нæ дарддæры равдыстыты.
