Горæтгæрон районы поликлиникæ бындуронæй рацарæзтой фарон. Фæзынд дзы ног медицинон кусæнгарз. Пациенттæн та ныр сæ бон фылдæр медицинон лæггæдтæ райсын у. Зæгъæм, компьютерон томографмæ ам тынг æхсызгонæй æнхъæлмæ кастысты. Куыд кусы ног уавæрты поликлиникæ, уый фенынмæ араст сты нæ уцхæсджытæ.
Ацы аппараты руаджы адæймаджы оргæнтæ бæлвырд æмæ æргом фенæн вæййы. Уæдæ кусæнгарзы æвзæр ахадындзинад адæймагыл дæр æппынкъаддæр у. Æртæ минутмæ хæрзхъæд диагностикæ ацæттæ вæййы. Горæтгæрон районы у фыццаг компьютерон томограф. Рентгенолог Тыбылты Азæмæты ныхæстæм гæсгæ, аппарат ныридæгæн йæ пълан 3 хатты фылдæр скодта.
Октябрьскæйы поликлиникæ æппынæдзух хуыздæрæй хуæздæрмæ тырны. Фарон азы кæронмæ йæ бындуронæй рацарæзтой. Цæгат Кавказы федералон зылды рæзты паддзахадон программæмæ гæсгæ дзы сæвæрдтой нырыккон кусæнгарз дæр. Пациенттæ дæр разы куыд нæ хъуамæ уой.
Поликлиникæмæ хауынц Горæтгæрон районы æппæт цæрджытæ дæр. Уый та у 100 мин адæймагмæ ввахс. Æрвылбон нырыккон медицинон иртæстытæ скæнынмæ æрбацæуынц 600 адæймагæй фылдæр. Ам сæ бон у се ‘нæниздзинады уавæр сæрæй – къæхтæм сбæрæг кæнын. Поликлиникæйы хайæдтæ 80%-мæ ифтонггонд сты хъæугæ кусæнгарзæй. Цы нæ фаг кæны, уый дæр сæм тагъд хъуамæ фæзына.
Медиктæ цы уавæрты кусныц, уый йæхи цæстæй фенынмæ æрбацыд æнæниздзинадхъахъхъæнынады министр Тебиаты Сослан. Уый куыд фæбæрæг кодта, афтæмæй республикæйы районты æппынæдзух хъæуы медицинон æххуыс хуыздæрæй-хуыздæр кæнын.
Медицинон æххуысы хæрхъæддзинад æнæмæнг фæхуыздæр уыдзæн ноджыдæр иу ногдзинадæй. Ам хæстæгдæр рæстæг саразынмæ хъавынц амбулаторон хирургон центр, «хирургия одного дня» кæй хонынц, ахæм. Уæд дзы фæзындæн фадат, рог операцитæ кæнынæн. Уæдæ поликлиникæйы лабаротимæ дæр ивддзинæдтæ бахæццæ сты. Ныр æмбырд кæндзæн районы æппæт фелсырон-акушерон пунктты анализтæ дæр.
Поликлиникæйы рацарæзтæн радих кодтой 370 милуан сомæй фылдæр. Специалистты ныхæстæм гæсгæ, хорз хатдзæгтæ ныридæгæн скæнæн ис. Нырыккон кусæнгарзы руаджы дохтыртæн сæ бон у уæззау низтæ рагацау рабæрæг кæнын.
