Æрвылаз Цæгат Ирыстоны районты стыр куыст бакæнынц адæмы цардыуаджы фадæттæ фæхуыздæр кæнынæн. Цалцæг кæнынц культурон, социалон æмæ æхсæнадон объекттæ. Ивынц коммуникацитæ. 2020 азы федералон æмæ национ проектты руаджы Хъæдгæроны бантыст культурæйы хæдзар æмæ скъола сног кæнын.
Зæгъæм, хъæуы скъолайы бæстыхай сарæзтой 1934 азы. Фыдыбæстæйы Стыр хæсты рæстæг немыцæгтæн уыд госпиталь. Хæсты фæстæ ахуыргæнæндон ногæй кусын райдыдта. Фæлæ уæдæй абонмæ бындурон цалцæг никуы уыд. Йæ къултæ мидæгæй згъæлыдысты. Пъолтæ ныззæронд сты. Хъармгæнæн системæ куыста къуылымпытимæ. 2020 азы бæстыхаймæ бæстонæй базылдысты. Сног кодтой æппæт коммуникацитæ дæр. Раивтой дуæрттæ, пъолтæ. Кæд раздæр скъолайы бæрæгбæттæ саразынæн бынат нæ уыд, уæд дзы ныр фæзынд зал дæр бадæн бынæттимæ.
Ивгъуыд азы ма бантыст хъæуы культурæйы артдзæст дæр сцалцæг кæнын. Культурæйы хæдзар бæстон цалцæггонд нæ уыд 2003 азæй. Нацпроект «Культурæ»-йы фæрцы ныр бæстыхай цæхæртæ калы. Ис дзы зал 300 бынатæн, аив сценæ. Раивтой хъармгæнæн æмæ рухсдæттæн системæтæ. Ног рудзгуытæ æмæ дуæрттæ, райдзаст кусæнуæттæ æмæ чиныгдон. Цалцæджы фæстæ культурæйы хæдзар æххæстæй кусын нæма райдыдта. Архайдзысты дзы шахматты, нывкæныны æмæ музыкалон къордтæ. Хор æмæ оркестр. Хистæртæн – æфсинты клуб. Цæсты ахады Хъæдгæроны аллей дæр Абациаты æфсымæрты уынджы. Сарæзтой йæ 19-æм æнусы. Нывылгонд 20 азæй фылдæр нæ уыд. Фарон йæ хуыз раивта. Ныр хъæуы цæрджытæн уыдзæн уарзон бынат сæ уæгъд рæстæг æрвитынæн.
Абациаты æфсымæрты уынджы ма 2020 азы раивтой рухсдæттæн системæ дæр. Ныр изæры дæр уынг вæййы райдзаст. Хъæуы дондзæуæн системæйы хай дæр сног кæнын бантыст. Куыстытæ пъланмæ гæсгæ кæндзысты 2 азы дæргъы. Ивгъуыд аз сæ райдвыдтой æмæ сæ ацы аз ахæццæ кæндзысты. Хъæдгæроны цæрджытæн сæ хъæуы бакастæй сæ зæрдæтæ райынц.
Ацы азмæ дæр бирæ нысæнттæ æвæрынц сæ размæ. Хъуамæ донцъирæнтæ дæр сцалцæг кæной. Раздæрау сын æххуыс кæндзысты районы администрацийы кусджытæ. Æмдых-æмзондæй фæллой та царды хæрзтæм кæны.
Хуасдзауты Алинæ
