Ацы уысм аивады стыр тых зæлы музыкæйы. Махъоты Ацæмæз роялы уæлхъус куы æрбады, уæд йæ зæлтæй адæймаджы арфдæр æмæ уæлдæр æнкъарæнтæ райхъал кæны. Аивадуарзджыты ахæссы алæмæты дунемæ. Æрбаиу кæны алы фæлтæрты минæвæртты.
Музыкант æмæ инструменты бастдзинад зын бамбарын кæнын у, фæлæ уый руаджы рауайы сыгъзæрин æндæхтæй нывæзт музыкæ. Дæ архайд зæрдæйæ куы цæуа, уæд, æнæмæнг, сбуц кæндзынæ музыкæйæн аргъгæнджыты. Сусæгдзинæдтæ хуымæтæг сты. Фæлæ, цæмæй дунейы хуыздæр залты ййафай, уый тыххæй рояль ивын хъæуы дыууæ азы иу хатт. Ирыстоны филармонийы та цы баивтаиккой, уый дæр нæ уыд. Сæ бæллиц уыд немыцаг кæнæ французаг инструмент, фæлæ алцыдæр – санкциты бын. 3 афæдзæй фылдæр сæ самал кæнæн нæ уыд. Музыкантты уырнгæ дæр нæ кодта, Петербургæй сæм æхсызгон хъусынгæнинагимæ куы сдзырдтой, уæд.
Роялы аргъ у 5 милуан соммæ хæстæг. Ахæм лæвар райста Цæгат Ирыстоны паддзахадон филармони. Кусæндонæн уый æхсызгон цау у. Раздæр пайда кодтой электронтæй, гастрольты уæрæсейаг ансамбльты фæхоныны гæнæн та уæвгæ нæ уыд. Ног инструментимæ фæфылдæр уыдзысты концерттæ дæр,- зæгъынц музыканттæ.
Хæрзгæнæджы ном ныр дæр бæрæг нæу. Фæлæ Ирыстоны музыкæйы райрæзтмæ йæ æвæрæн æгæрон у. Октябры байгом уыдзæн ног сезон. Сæйраг ролы та уыйдзæн, ног нырыккон французаг рояль. Музыканттæ зæрдæ æвæрынц, ныр, Цæгат Ирыстоны филармонийы юбилейон концерт рауайдзæн ирд æмæ парахат.
