Хетæджы Дзуары бæрæгбоны фæдыл æдасдзинады фарстатыл дзырдтой сæрмагонд æмбырды. Архайдтой дзы республикæйы мидхъуыддæгты министрады, Уæрæсейы Гвардийы, Æнæнхъæлæджы уавæрты æмæ Алагиры районы бынæттон хиуынаффæйады минæвæрттæ, уыимæ Иры Стыр ныхасы уæнгтæ æмæ æнæниздзинад хъахъхъæнынады министрады минæвæрттæ.
Пъæлицæйы булкъон Сабанаты Альберт куыд бафиппайдта, афтæмæй Цæгат Ирыстоны Хетæджы Дзуары бæрæгбон æппæты ахсджиагдæртæй иу у. Уый тыххæй хъæуы æдасдзинады æмбæлгæ домæнтæ сæххæстæ кæнын Кувæндоны. Профилон ведомствоты хъæуы иумæйаг мадзæлттæ аразын, цæмæй бæрæгбоны барадхæлдтытæ ма уа, уый тыххæй.
Алагиры районы Барадхъахъхъæнджытæ фæкусынц бынаты æмæ сæ фæрцы бæрæгбон æнæ æнæнхъæлæджы цаутæй ахицæн вæййы. Æмбырды архайджытæ зæрдæ бавæрдтой, ацы аз дæр Хетæджы Дзуармæ адæмæн æнæ къуылымпытæй кæй уыдзæн сæ бон бакувын.
