Тæрхæджытыл хостæ бирæ — хъæугæтæ та се ‘хсæн нæй. Ахæм уавæримæ ныртæккæ республикæйы цæрджытæ арæх æмбæлынц. Зын ссарæн сты æнæмæнг хъæугæ хостæ дæр. Зæгъæм, сæкæрнизы ныхмæ. Сæ бæсты рынчынтæн аналогтæ дæттынц, фæлæ æлхæнджыты уыдон нæ хъæуынц. Уавæр равзæрстой нæ уацхæсджытæ.
Хостæ нæма æрбаластой, – ацы ныхæстæ афтекы кусджытæ боны дæргъы сæдæгай хатт фæзæгъынц. Æлхæнджытæн æппынæдзух æмбарын кæнынц, кæй нæ фаг кæнынц æрмæст фæсарæнтæй ласт препараттæ.
Хостæ ласыны хъуыддаджы къуылымпыдзинæдтæ кæй ис, уый æппæт афтектыл дæр фæзынд. Паддзахадон уа æви хи къухты – уæлдай нæу. Бæстæйы кондады минæвæрттæ дæр уавæрмæ цырд фæлæууыдысты. Грипп æмæ æхснырсæджы афон фылдæр препараттæ рауагътой.
Афтекты тæрхæджытæ афтид не сты, хостæ сыл бирæ ис. Æмæ кæд грипп æмæ æхснырсæгæй сæхи чи дзæбæх кæны, уыдон зындзинæдтæ не ‘ййафынц, уæд хицӕн уавæртæм гæсгæ чи исы хостæ, уыдон тыхсынц. Фæсарæнтæй ласт препараттæ сæм æппындæр нал хауы. Афтектæй иуты стæмхатт фæзыныц, иннæты та мæйгæйтты дæр бахъæуы æнхъæлмæ кæсын.
Уый хыгъд, адæмы уæрæсейаг аналогтæ исын нæ фæнды. Сæ хæрзхъæддзинад æвзæрдæр у, зæгъгæ. Фæлæ цæмæй фæсарæйнаг хос къухы бафта, уый тыххæй хъæуы дохтырмæ бацæуын, медицинон къамис ацæуын. Кæд, йæ хатдзæгтæм гæсгæ, низ æнæ æрбаласæггаг препаратæй не сдзæбæх уыдзæн, уæд æй пациентæн сæрмагондæй балхæндзысты.
Фæсарæйнаг препараттæ нæхиуæттæй тынг кæй хицæн кæнынц, уый фидарæй зæгъæн нæй. Уавæр нырма сбæлвырд кæнын хъæуы, зæгъынц Æнæниздзинад хъахъхъæнынады министрады. Уæвгæ, регионы афæдзы райдиан хостæ ласыны хъуыддаджы къуылымпыдзинæдтæ æрвылаз дæр вæййы.
Уæдмæ та уал, хицӕн уавæртæм гæсгæ хостæ чи исы, уыдоны банхъæлмæ кæсын хъæуы. Кæнæ та хъæугæ препарат хи тыхтæй самал кæнын. Экспертты ныхæстæм гæсгæ, фарста сæвзæрд федералон æмвæзадыл, кусын ыл хъæуы бынæтты æмæ иумæйагæй. Цæмæй, се ‘нæниздзинадмæ гæсгæ хостæ æнæмæнг кæмæн сты, уыдон афтекмæ бацæугæйæ, зындзинæдтæ мауал ‘ййафой.
