«Хъæуты комплексон райрæзты» федералон программæйы руаджы цæрæнбынæттæ нырыккондæр кæнынц. Фæзыны дзы социалон ахсджиаг инфраструктурæ. Цæгат Ирыстоны программæ æнтыстджынæй æххæст кæнынц. Тагъд нырыккон спортивон комплекс фæзындзæн Хуымæллæджы. Фæлтæрдджын тренерты архайдимæ хъæуы фæсивæд спорты хи фæлвардзысты. Куыстытæ куыд æххæстгонд цæуынц, уый тыххæй нæ дарддæры æрмæг.
Мæнæ ахæм хуыз сæрды уыдзæн нырыккон спортивон комплекс Хуымæллæджы. Мин фондз сæдæ квадратон метрыл апарахат уыдзысты гауызтæ грекъаг-ромаг хъæбысхæстæн, тренажерты зал, санитарон уаттæ æмæ административон корпус. Куыстытæ ныртæккæ сæ тæмæны сты. Баххæст сын кодтой сæ 70%.
Хуымæллæджы спорты хи профессионалон хуызы фæлварынæн æмбæлгæ уавæртæ нæй. Бахъæуы горæтмæ цæуын. Ныр сывæллæттимæ архайдзысты фæлтæрдджын специалисттæ. Нырыккон объект аразынц «Хъæуты комплексон райрæзты» федералон программæмæ гæсгæ.
Программæйы сæйраг хæстæ — хъæуты цæрджыты уавæртæ фæхуыздæр кæнын, социалон-инженерон-транспортон инфраструктурæйы райрæзт, спорт æмæ культурæйы авналæнтæ фæуæрæхдæр кæнын. Афæдзæй-афæдзмæ республикæйы фæзыны фылдæр ахæм объекттæ.
Ацы программæйы фæлгæты ма Хуымæллæджы сног кæндзысты дондзæуæн хæтæлты 30 километры. Нырыккон хæтæлтæ уыдзысты фидардæр, зæгъынц специалисттæ. Æппæт куыстытæ дæр æххæсгонд цæуынц нысангонд афонæй раздæр.
Программæ ахæсдзæн 2025-æм азмæ. Цæгат Ирыстон Уæрæсейы ахсы æвдæм бынат хъæуты комплексон райрæзты программæ æнтыстджынæй кæм æххæст кæнынц, уыцы регионты ‘хсæн.
