Ходы Николай Кисловодскæн балæвар кæндзæн Лермонтовы ног барельеф

Кисловодскы фæзындзæн Лермонтовы номыл ног барельеф. Бронзæйæ конд цыртдзæвæн, Кисловодскы парчы сæвæрыны фæнд скодтой «Время Лермонтова»-йы организацийы бархионтæ. Кусгæ та йыл бакæндзæн Уæрæсейы нывгæнджыты цæдисы уæнг, не `мзæххон Ходы Николай. Раздæр дзы цы барельеф уыдис, уый знаггадгæнджытæ ратыдтой. Се `нæзонд митæ бахаудысты видеоцæстдарды системæйы камерæмæ. Ныртæккæ уыцы кадртæ уынут уæ экрантыл. Нырма уал æбæрæг чи у, уыцы фыдбылызы гуырдты агурынц барадхъахъхъæнджытæ. Кæй ратыдтой, уыцы дурæй нывæфтыд афтæмæй 2 азы размæ сцалцæг кодтой. Ног цыртдзæвæн фæлладуадзæн бынаты кусджытæн Ходы Николай æхцайыл нæ кæны, фæлæ лæвар. Уыцы хъуыддаг Кисловодскы цæрджыты зæрдæ балхæдта, тынг дзы фæбузныг сты. Бæрæг ма куыд у, афтæмæй ног барельеф арæзт æрцæудзæн цыбыр æмгъуыдмæ.