Хуыбаты Батрадз спорты ныр 14 азы ис. Йæ æнтыстдзинæдты хыгъды — æппæтадæмон турниры уæлахиз Албанийы, дунейы чемпионаты ӕвзист. 18 азмӕ лæппу у Уӕрӕсейы ерысты ӕртӕ хатты уӕлахиздзау ӕмӕ ӕхсӕз хатты призер. Йæхи ерыстæм алкæддæр бæстонæй фæцæттæ кæны. Тохы алы ныхмӕлӕууӕгӕн дӕр архайы йӕхи рæвдзад æмæ стиль ныффидар кæныныл.
Дыккаг сыгъзӕрин Гулуты Миланӕмӕ. Спортмӕ чызг ӕрбацыд йӕ фыды фӕндагыл. Бæстон тренировкӕтӕ, карз дисциплинӕ, алы тохы фæстæ равзæрст. Йæ архайдмæ ахӕм ахастдзинад æй æркодта Уӕрӕсейы ерысты уӕлахизмӕ ӕмӕ иугонд командæйы хыгъдмæ. Миланӕйӕн уый ӕнӕнхъӕлӕджы хъуыддаг нӕу, фӕлӕ æппынæдзухы хиуыл куысты хатдзæг. Зӕгъы, зындзинӕдтыл не ‘мбæлд, ахсджиаг у, сабыр уӕвын ӕмӕ ӕнкъарӕнты хицауиуæг кæнын нæ уадзын. Разæй æрмæст иу нысан — рамбулын.
Сӕхи цӕттӕ кодтой бæстонæй. Бон дыууæ тренировкæйы. Фæсивæдæн ма æмбырдты фадат уыд национ командæйы уæнгтимæ сӕ тыхтӕ бафӕлварынӕн. Уӕрӕсейы чемпионат цыд 20-æм æй 25-æм маймӕ. Архайдтой дзы 500 тхэквондистæй фылдæр. Республикæйы ном хъахъхъæдтой 10 спортсмены.
Ерыстӕ кæронмæ æрхæццæ сты. Ныртӕккӕ ахсджиаг у цæттæдзинад ма фесафын, фæлæ ноджы тыхджындæр суæвын. Бæстæйы чемпионаты уӕлахиз фӕллад уадзыны ӕфсон нæу, разæй — Уæрæсейы кубок, уый райдайдзæн 26-æм июны. Æмæ уымæ гæсгæ тренирвокæтæ систы ноджы арæхдæр æмæ бæстондæр.
Милдзыхты Амалия
