Цæрдæг старт æмæ абарæн кæй ницæимæ ис, ахæм æнкъарæнтæ. Барджытæй алкæйы дæр фæнды фыццаг суæвын. Хуымæллæджы фæсивæды бафæндыд ацы ерыстæ ныр та сæ хъæуы саразын. Бирæ лæппутæ дзы ис, бæхтæ чи уарзы æмæ чи дары, ахæмтæ. Мадзаларазджытæ иу Гæбæгкаты Вилен йæхæдæг дæр йæ сабибонтæй фæстæмæ бады бæхыл. Ныр дæр ерысты архайдта йæ бæх Обруч.
Гуырцъыты Тимур ерыстæм æрбацыд сыхаг Зилгæйæ. Йæ бæхимæ иу æмæ дыууæ хатты не сси ахæм дугъты уæлахиздзау. Йæхæдæг куыд зæгъы, афтæмæй, фыццаджыдæр, цыппаркъахыг хæлары хъæуы уарзын æмæ йæм раст зилын. Афтæмæй та уæлахиздзау суæвын дæр зын нæу. Фыццаг бынæттæ Тимур алыхуызон ерысты йæ бæхимæ бацахста 7 хатты.
Цалдæр мæйы размæ ахæм ерыстæ арæзт æрцыд Беслæны Ипподромы. Уый фæстæ ма бæхтыл дугъ сарæзтой Дигорайы. Ныр та ерыстæ ацыдысты Хуымæллæджы.
Бæхтыл дугъ снысан кодтой Хетæджы Лæгты Дзуары бонмæ. Фæнды сæ алы аз дæр бæрæгбонмæ бæхтыл дугъ аразын.
Зæгъын ма хъæуы уый, æмæ ерысгæнджыты ‘хсæн ис чызджытæ дæр. Уыдон лæппутæй къаддæр нæ архайынц рамбулыныл. Маматы Амелинæ дугъ кæнынмæ ссыд Дигорайæ. Фыццаг старты йæ бæх фæтарст, фæлæ дыккаджы йæ фæстæ фæуагъта иннæты.
Мадзал саразыныл чи архайдта, уыцы фæсивæды фæнды ацы спорты хуыз ирхæфсæнæй спортивон æмвæзадмæ сисын. Уый та рауайдзæн æрмæст алы районты барджытæ, æмæ ма суанг сыхаг республикæйты минæвæрттæ, кæрæдзиимæ куы æмбæлой ерысты, сæ арæхстдзинадыл куы кусой æмæ фыццаг бынæттæм куы тырной, уæд.
