Ног кусæнгæрзтæй сифтонг кодтой Мæздæджы рынчындоны æртæ хайады. Балхæдтой сæ, республикæйы бюджетæй цы `хцайы фæрæзтæ радих кодтой, уыдонæй. Рынчындоны фæзынд эндоскопийы дыууæ аппараты, æнæрхъуыдыйæ нæ баззадысты дадзинты реанимаци æмæ офтальмологион операцигæнæн уат дæр. Районы цæрджытæ цы поликлиникæйы лæггæдтæй пайда кæнынц, уым та фæзынд ног УЗИ-аппарат. Нæ дарддæры æрмæг – Мæздæгæй.
Мæздæджы рынчындоны офтальмологон центры куыст йæ тæмæны бацыд. Апрелæй нырмæ йе `нæниздзинад кæмæн фæцудыдта, уыдонимæ æрвылбон кусынц дохтыртæ. Алчидæр сæ æндæр дзырд нæ кæны. ног кусæнгæрзтимæ сын дзæвгар æнцондæр фæцис. Уæдæ медицинон лæггæдты хæрзхъæддзинад дæр фæхуыздæр.
Рынчындоны пациент Надежда Долматова: «Рынчындоны-иу раздæр азмæлæн нæ уыд адæмæй. Раст-иу кæрæдзийы сæртыл бадтысты. Ныр ма бакæсут, цас хуыздæр фæцис, уымæ. Дохтырты куыст дæр фæахадгæдæр. Мæ зæрдæмæ алцыдæр цæуы».
Фæлæ æппæт уыцы хъуыддæгтыл куыст нæ фæцис. Цалдæр къуырийы фæстæ сæм фæзындзæн операцигæнæн уат дæр. Абон уый тыххæй радзырдтой республикæйы æнæниздзинад хъахъхъæныны министр Михаил Ратмановæн. Сæ зæрдæтæ дохтыртæн райынц. Сентябры сæ къухы бафтдзæн рынчынтæн, зæгъæм, сæ цæстытæн фыццаг операцитæ скæнын.
Цæстыты низты Дзæуджыхъæуы клиникæйы директор Дзгойты Иринæ: «Бирæ курдиæттæ нæм уыдис районы цæрджытæй, цæмæй сæхи дзæбæх кæнынмæ дард искуыдæм ма цæуой. Уымæ гæсгæ нын бахæс кодтой, цæмæй ам бынаты саразæм операцитæгæнæн уат. Уый нын фадат радта уыцы куыст районæн йæхимидæг кæнынæн».
Бабæрæг кодтой эндоскопийы хайад дæр. Ам фæзынд, хуылфыдзаумæтты уавæр цæмæй иртасой, ахæм аппаратурæ. Дохтырты цинæн кæрон нал ис, сæ ныхæстæм гæсгæ сæ авналæнтæ фæуæрæх сты. Афтæ – сæ гæнæнтæ дæр. Æркасты рæстæг кусæнгарзы экраныл фадат ис рынчыны уавæрмæ биноныгдæрæй æркæсынæн, йæ низыхатт ын тагъддæр равзарынæн.
Уыйфæстæ министр сбæрæг кодта, рынчындоны цы реанимацийы уат ис, уый ифтонгад. Ног кусæнгарзимæ ныр зæрдæ æмæ дадзинтимæ баст низтææй сæйгæ рынчынтæм бæстонæй кæсынц. Министры ныхæстæм гæсгæ, ацы реанимацион уаты ныр аккаг æххуыс бакæндзысты инфаркт æмæ инсульт кæмæ ис, ахæм рынчынтæн дæр. Фæхуыздæр районы поликлиникæйы уавæр дæр. Фæзынд дзы УЗИ-иртæстыты аппарат. Ахсджиаг уый у, æмæ æнцонтæй рабæрæг вæййынц, чи нæма райгуырд, суанг ахæм сывæллæтты низтæ дæр. Ахæм кусæнгæрзтæ нæ республикæйы нымадæй 4 йеддæмæ не сты. Æртæ – Дзæуджыхъæуы, иу та ныр ам – Мæздæджы.
Михаил Ратманов: «Æнхъæлцау сылгоймæгтæм цæстдарæн хайад Дзæуджыхъæуы дæр æмæ Мæздæджы дæр æмхуызонæй сифтонг кодтам. Дарддæр алцыдæр дохтырты зонындзинæдтæ æмæ арæхстдзинæдтæй аразгæ у. Зæгъын хъæуы уый, æмæ ахæм аппараттæ бирæ хи медицинон центрты дæр нæй. Афтæмæй паддзахадон æнæниздзинад хъахъхъæныны къабаз йæ техникон ифтонгадæй бæрзонддæр къæпхæнмæ схизын кæндзыстæм».
Поликлиникæйы бæстыхай зæронд кæй у, уый дæр æнæрхъуыдыйæ нæ баззад. Ног аразын райдыдтой. Афæдзы кæронмæ уыдзæн цæттæ. Йæ дуæрттæ байгом кæндзæн. Уый та Мæздæджы районы сылгоймæгты – цины бæрæгбон.
