Ирон академион театры ацыд сæрмагонд пресс-конференци дзыллон-информацион фæрæзты минæвæрттимæ. Æргом ныхасы фæлгæты театры разамынд скодта 2022-æм азæн хатдзæгтæ, радзыртой фидæны премьерæты тыххæй, æрдзырдтой театры ногдзинæдтыл. Афтæ 87-æм театралон сезоны райдайæнæй абоны онг равдыстой 3 ног спектаклы премьерæтæ. Се`хсæн спектакль «Се человек» æмæ «Демон».
Уымæй уæлдай, «Большие гастроли»-йы фæлгæты сæ къухы бафтыд Саранскмæ дæр ацæуын. Ис сæм фидæнмæ хъуыдытæ дæр. Афтæ декабрмæ цæттæ кæнынц сывæллæттæн спектакль «Золушка» ирон æвзагыл. Ратæлмац æй кодта Цариты Валерий. Шекспиры æнӕмæлгæ классикæ дæр уæдæ театрæн у зынаргъ æмæ адджын. Февралмæ цæттæ кæнынц спектакль «Король Лир». Культурон хъæппæристы президентон гранты фæрцы фæнд кæнынц Ильф æмæ Петровы роман «12 стульев»-мæ гæсгæ мюзикл бацæттæ кæнын.
Фæнысан ма кæнын хъæуы, мартъийы мæйы театры сценæйыл равдисдзысты ирон классикæйы ирд уацмыстæй иу – «Челе». Ацы уацмыс ис ахуырадон программæйы. Театры гæнæнтæ парахат кæнынц. Ныр спектакльмæ билеттæ балхæнæн ис электрон хуызы.Тагъд рæстæджы та фæзындзæн мобилон уæлæфтуан. Уымæй уæлдай-ма хъæуты цæрæг скъоладзаутæн спектаклтæм æрбацæуыны хъуыддаг фæрогдæр кодтой.
Ногдзинæдтæ театры агъуыстыты дæр. Фæзынд дзы чысыл сценæ. Ныридæгæн кусы, йæ фæрцы репертуар фæпарахатдæр. Тагъд рæстæджы дзы хъуамæ сæвæрой спектакль «Маленький принц». Ноджы ма дзы театры вестибюлы фæзындзæн театралон кафе. Спектаклы размæ æмæ антракты рæстæг дзы уыдзæн цай бацымæн. Зæлдзæн дзы музыкæ. Уæдæ ацы фæзуатыл литературон изæртæ дæр араздзысты.
