Солæман хæххон Тменыхъæуы райгуырд, бирæсывæллонджын бинонты. Фæстæдæр ралыгъдысты Даскъофмæ. Авд къласы каст фæцис Елхоты, скъолайы сарæзта драмон къорд. Мæскуыйы Театралон аивады институты ирон профессионалон театралон студимæ фыццаг чи ахуыр кæнынмæ чи бацыд, уыцы фæсивæды ‘хсæн уыд Таутийы-фырт дæр.
1935 азы 10 ноябры Ирон театр байгом спектакль “Платон Кречет”-æй. Сæйраг роль хъазыд Солæман. Сценæмæ-иу рахызт æрыгон актерты тыхджын къорд, фæлæ адæм сæ цæст Таутийы-фырты хъазтыл æрæвæрдтой. Йæ фарн уæлæуыл кæй баззад, уымæн абон æвдисæн йæ уарзон театры курдиатджын кæстæртæ. Битарты Алыксандыр æмæ Хъæцмæзты Лазæр аивадуарзджыты размæ рахастой Плиты Грисы пьесæмæ гæсгæ æвæрд спектакль “Чермен”-æй скъуыддзаг.
Ирон театр йæ фыццаг юбилеймæ сæвæрдта Дзанайты Иван æмæ Епхиты Тæтæрийы фыст уацмысмæ гæсгæ спектакль “Къоста”. Къостайы роль Солæманæн бахæс кодтой. Дзырдта, зæгъгæ, Къостайы сурæт саразын кæд мæ бон бауа, уæд мæхицæн зæгъдзынæн: “Таутийы-фырт дзæгъæлы нæ бацыдтæ ирон аивадмæ”. Йæ хъазты тыххæй фыссæг-драматург Николай Погодин афтæ загъта: “Æз рагæй нал федтон театры ахæм цæстысыгтæ. Залы куыдтой ирæттæ, уырыссæгтæ, ацы рæнхъыты автор дæр”. Къостайы уацмыстæ Ирон театры сценæйыл ис абон дæр.
Иу фæлгонц ын иннæйы хуызæн никуы рауад. Алы дзырд дæр-иу цалынмæ лæмбынæг нæ бамбæрста, театрдзаутæм дзы æнкъарæнтæ хæссы, уыдон йæхи нæ бауырныдтаидкой, уæдмæ-иу куыста йæ фæлгонцыл.
Цæгат Ирыстоны фыццаг адæмон артист, Ленины ордены кавалер Таутиаты цæхæрцæст Солæман. Хорз лæгæн йæ алы къахдзæф дæр фæстагæттæн фæзминаг вæййы. Кæд Солæманы цардвæндаг хæрзцыбыр рауад, уæддæр раст цыма йæ 100 азы сæрты акаст, уыйау нæй кæрон йæ номыл мысинæгтæн.
