Иумæйаг ахуырадон тыгъдад саразыныл ныхас кодтой педагогон кусджыты æрвылазон августы æмбырды. Конференцийы бацархайдта республикæйы сæргълæууæг Сергей Меняйло, стæй федералон профилон ведомствоты минæвæрттæ æмæ Цæгат Ирыстоны ахуырады системæйы кусджытæ. Мадзал райдыдта презентацион равдыстæй. Республикæйы уагдæттæ дзы сæ архайд равдыстой.
Æмбырды ныхас цыд скъолайы æмæ астæуккаг профессионалон ахуырады райрæзтыл. Уымæй уæлдай материалон-техникон ифтонгад æмæ ахуырады нырыккон гæнæнтыл. Сергей Меняйло куыд фæнысан кодта, афтæмæй системæйы сæйрагдæр ахуыргæнджытæ сты. Удонæн æххуыс кæнын æмæ сæ райрæзтыл кусын хъуамæ суа сæйраг хъуыддаг.
