Хъарм хæринаг, зарджытæ æмæ кæфтытæ. Уæззау боны фæстæ ма хуыздæр цы вæййы? Афтæ хъæрмуд æмæ хæларæй ацыд кадетты программæ. Уыдысты экскурситы, хъазыдысты националон хъæзтытæй, се ‘хсæн чъоп, æхстытæ. Архайдтой хæцæнгарз райхалын æмæ æрæмбырд кæныныл. Фæсивæд райстой ирд æнкъарæнтæ.
Сæйраг нысан – республикæты ‘хсæн бастдзинад фидардæр кæнын. Кæсæг-Балхъары делегаци уазæгуаты ссыд ныр 15-æм хатт. Æмæ уый æрмæст кадеттæ нæ. Фæсивæд, активисттæ, хистæртæ. Нæ фæзуæттыл аразыц дæсгай иумæйаг мадзæлттæ. Фæнысан кæндзыстæм, сæдæ азы бæрц патриотон хъомыладыл кæй архайы бынæттон Досааф. Ахæм хъæппæрис фыццаг разынд хайады сæрдар Гуцъунаты Олегмæ.
Фæсивæд ссардтой Беслæны скъолайы теракты амæттæгты рухс нæмттæ. Делегацийæн ацы хъуыддаг сси традици. Кæсæг-Балхъары скъолаты æмæ музейты та арæх саразынц мысæн мадзæлттæ. Æрмæст иу нысанимæ, цæмæй ахæм фыдцау макуы уал æрцæуа. Поэтикон клуб æмæ фысджытæ ныффыстой алыхуызон уацмыстæ амæттæгты номыл.
Уазджытæн сарæзтой егъау экскурси. Равдыстой сын кабинеттæ, бæстон сын радзырдтой уыцы цауты тыххæй. Хистæртæ æмæ сывæллæттæ сæм лæмбынæг хъуыстой.
Фидæнмæ сæм, æцæг дæр, бирæ фæндтæ ис. Кæсæг Балхъарæй делегаци фæнд кæны цымыдисаг мадзæлттæ саразын. Архайдзысты дзы 8 организацийы. Республикæйы хæхтæй иуы бæрзæндыл фæнд кæнынц Беслæны теракты амæттæгтæн сæвæрын номарæн фæйнæг.
