Базарадон-экономикон колледжы студент Калоты Ацæмæз бацахста фыццаг бынат националон чемпионат «Абилимпикс»-ы. Архайдта Ирон чъиритæ кæнынӕй ерысы. Ацæмæзы ‘мхуызон ацы дæсныйад æвдыстой Уæрæсейы æппæт регионты минæвæрттæ дæр. Цæгатирыстойнаг хæринаггæнæг ссардта фæндаг жюрийы уæнгты зæрдæтæм йæ аккаг архайдæй. Уæлахиздзауы тыххæй нæ дарддæры æрмæг.
Урс-урсид ссад æмæ æнхъизæн цæттæ сты, фæлæ хæмпус хыссæ скæнынæн æнæмæнг хъæуы дæсны къӕбӕргæнæг. Æрыгон хæринаггæнæг Калоты Ацæмæз йæ куыст æгӕрон уарзтӕй уарзы. Чъиритæ кæнын сахуыр йæ мадмæ гæсгæ. Ныр æртыккæгæм аз ахуыр кæны Цæгат Ирыстоны паддзахадон базарадон-экономикон колледжы.
Æмæ куыд рабæрæг, афтæмæй Ацæмæз йæ куыст иттæг хорз кæны. Октябры фæуæлахиз националон чемпионат «Абилимпикс»-ы «Ирон чъиритæ кæныны» здæхты. Ерыстæ сæрмагондæй арæзт сты, се ‘нæниздзинад хъыгдæрд кæмæн у, ахӕм фæсивæдæн. Ацæмæз уыд æгас бæстæйæ 23 финалисты ‘хсæн. Тæрхонгæнджытæ кастысты лæмбынæг. Хæринаггæнæджы алы фезмæлд дæр хъуамæ уа æнæаипп.
Ацæмæзæн æххуыс кодтой йæ ахуыргæнджытæ. Архайдтой бæстонæй. Цалынмæ йæхи цæттæ кодта, уæдмæ чъириты æппæт хуызтæ дæр базыдта кæнын. Ацæмæзы зондамонджытæ куыд зæгъынц, афтæмæй лæппу у зæрдæргъæвд. Йæхицæн нысан куы сæвæры, уæд æнæмæнг йæ къухы бафты.
Ацæмæз йӕхицӕн фидæнмæ стыр нысæнттæ сӕвӕрдта. Колледжы фæстæ йæ ахуыр хъуамæ адарддæр кæна Мæскуыйы паддзахадон университеты. Суыдзæн нутрициолог. Æнæниз цардыуаг æмæ хæрды специалист. Колледжы цы зонындзинæдтæ исы, уыдон та йын йæ ног дæсныйады тынг феххуыс уыдзысты.
