«Таджикистаны культурæйы бонтæ» цæуынц Цæгат Ирыстоны. Нациты ‘хсæн фестиваль баст у Уæрæсе æмæ Таджикистаны ‘хсæн дипломатон ахастдзинæдимæ. Делегацийы минæвæрттæ бабæрæг кодтой мемориалон уæлмæрд «Зæдты сахар», сæвæрдтой дидинджытæ Фирдоусийы цыртдзæвæныл. Фестивалы программæйы бирæ фембæлдтытæ: Нациты ‘хсæн ахастдзинæдты министрады, Куыстдæттыны комитеты, республикæйы уæлдæр ахуыргæнæндæтты, стæй мидхъуыддæгты министрады управленийы.
Ахсджиаг культурон цаутæй иу – Таджикистан æмæ Ирыстоны аивæдты дæсныты концерт. Ацыд Уырыссаг театры сценæйыл – æвдыст дзы æрцыд национ кæфтытæ, зарджытæ æмæ æмдзæвгæтæ. Мадзал бабæрæг кодтой дины иугондты æмæ республикæйы хицауады минæвæрттæ. Фестивалы фæлгæты ма студи «Таджикфильм» равдыста, республикæйы адæмон артист Уататы Бимболат кæм ахъазыд, ахæм киноныв.
Уымæй уæлдай ма уазджытæ бабæрæг кодтой Медицинон академи. Аныхас кодтой студенттимæ. Дзырдтой фидæнмæ нысантыл. Фембæлды сæйраг хъуыды – нациты ‘хсæн ахастдзинæдтæ парахат кæнын.
