“Абон райсомæй 1-æм скъолайы кæртмæ хæцæнгæрзтимæ æрбабырстой”, — ацы ныхæстæй, 21 азы размæ куыд уыд, афтæ ныр дæр нырризы зæрдæ. Æфсæддонтæ, милицæ æмæ хуымæтæг цæрджытæ — иууылдæр цæфты хæссынц, ирвæзын сæ кæнынц. Кадртæ кæрæдзийы куыд ивынц, цæссыгтæ дæр афтæ згъорынц рустыл. Наталья Штондайы фильмографийы бирæ куыстытæ ис, фæлæ, режиссер йæхæдæг куыд зæгъы, афтæмæй фæстаг æппæтæй зындæр рауад.
— Тынг бузныг дæн ацы кинонывы архайын чи сразы ис — нæ хъайтартæй. Сæ алкæйы тыххæй дæр хицæнæй кино сисæн ис. Мæнæн сты хъæбатырдзинады дæнцæг. Ногæй къæхтыл слæууæн æмæ дарддæр цæрынæн тыхтæ ссарæн куыд ис, уый сæхи дæнцæгæй равдыстой.
Амынæты чи уыд, уыдоны зындоны 3 бонмæ аздæхын бахъуыд кинонывыл куысты рæстæг. Уыцы фыдзынтæ æрымысын æнцон хъуыддаг нæу. “Сæ хъæдгом сын бæттынц æмæ бæттынц, фæлæ уæддæр туг нæ уромы”, — зæгъы Наталья. Йæ ныхасмæ гæсгæ, дыккаг хатт ахæм проектыл бакусын йæ бон нал суыдаид.
Фидæны дохтыртæн равдыстой, 21 азы размæ се ‘мкусджытæ адæмы куыд ирвæзын кодтой, уый. Залы иу уазал цæстæнгас дæр нæ уыд. Уыцы цаутæ мысын зын у, фæлæ сæ рохгæнæн нæй. 3-æм курсы студенткæ Хъуызилты Камиллæ фæбæрæг кодта, уал азмæ бирæ ивддзинæдтæ кæй æрцыд, фæлæ 2004-æм азы сентябры фыццаг 3 боны фæд зæрдæты æнæивгæ у.
Республикæйы киноныв фыццаг хатт равдыстой. Æхсæнад “Знание”-йы разамындæй ма уыдзæн дыууæ равдысты — Цæгат Ирыстоны паддзахадон университеты æмæ Беслæны 1-æм скъолайы. Дунейы историйы æбуалгъдæр фыдракæндтæй иуы тыххæй лентæ равдыстой æндæр регионты дæр, се ‘хсæн Мæскуы, Санкт-Петербург, Рязань æмæ æндæртæ.
