4-æй-6-æм июньмæ, горæт Кировы цæудзысты компьютерæй архайыны арæхстдзинад равдисынимæ баст ерыстæ. Архайынц дзы хистæр кары адæм. Се`хсæн ис Цæгат Ирыстонæй минæвæрттæ дæр – Æлборты Людмилæ æмæ Хъæцмæзты Юрий. Æлборты Людмилæ архайы номинаци «Уверенный пользователь», зæгъгæ, Хъæцмæзты Юрий та «Начинающий пользователь»-ы.
Дыууæйæ дæр ахызтысты республикон æвзарæн къæпхæны сæрты. Цæуы сыл 65 азæй фылдæр. Фæстаг 3 азы бæстонæй райдыдтой нырыккон технологитæ ахуыр кæнын, æнæзивæгæй æмæ арæхстджынæй кусынц компьютеримæ. Уæдæ социалон хызæгтимæ дæр хæларæй бацардысты. Фæнысан ма кæнын хъæуы уый, æмæ Хъæцмæзты Юрий ма ахуыр кæны Хæххон-Аграрон университеты, 2 курсы. Уæрæсейы пенсиисджыты цæдисы республикон хайады сæрдар Раиса Шабельниковайы ныхæстæм гæсгæ, ахæм ерыстæ сты хъæугæ.
Хистæр кары адæм сæ рæстæг пайдаимæ æрвитынц. Азæй-азмæ архайджыты нымæц кæны фылдæр. Ацы аз, ерыстгæнджытæ сты нæ бæстæйы 80 регионæй. Уымæй уæлдай ма, сæ арæхстдзинад æвдисынц минæвæрæттæ Германийæ, Беларуссийæ, Италийæ æмæ Арменийæ.
