«Космос — афтæ зын нæу, сывæллоны зæрдиагæй йæ базонын куы фæнда, уæд». Афтæ дзырдта зындгонд космосон инструктор æмæ Дзæуджыхъæуы космонавтикæйы скъолайы бындурæвæрæг Къомайты Руслан. Азæй-азмæ космосмæ чи цымыдис кæны, уыцы фæсивæд фылдæр кæнынц. Ацы аз сын байгом наукон-зонадон лагерь.
Чысыл фантази, ахорæнтæ – æмæ дун-дунемæ атындзынмæ цæттæ. Ахæм гæнæнтæ дæтты косманавтикон скъолайы сæрдыгон наукон-зонадон лагерь. Бацархайын дзы кæй фæнды, уыдон сты бирæ. Дарчиты Валерия цæры æмæ ахуыр кæны Мæскуыйы. Сæрдыгон улæфæн бонты Ирыстонмæ ссыд йæ нанамæ. Космосы сусæгдзинæдтæ йæ цымыдис кæнынц 6 азæй нырмæ. Кæцыдæртæ дзы ныр дæр базыдта.
Фæсивæдæн ам ис бирæ гæнæнтæ. Бацæттæ сын кодтой цымыдисаг ахуыртæ. Сæхи къухтæй аразынц космонафты сæрмагонд уæлæдарæс, спутниктæ æмæ æндæр аппаратты скъуыддзæгтæ. Ахуыргæнджытæ куыд зæгъынц, афтæмæй сæйрагдæр у æххуыс кæнын æмæ сæ фарсмæ лæууын. Æрмæст афтæмæй космосмæ фæндаг уыдзæн æнцондæр.
Иу къордӕн йӕ рæстæг у 2 къуырийы. Уыцы æмгъуыдмæ сывæллæттæ ахуыр кæнынц астрономи, физикæ, уымæй уæлдай ма сæхи фæлварынц пилотон космонавтикӕйыл.
Кæронбæттæны фæсивæдмæ æнхъæлмæ кæсы æрыгон космонавтты ардхӕрд. Архайджыты схорзæхджын кæндзысты космонавтты скъолайы нысæнттæ æмæ пилотты боныгтæй. Астронавтон лагерь фæнд кæнынц æрвылазон саразын. Апарахат ын кæндзысты йæ сфæлдыстадон гæнæнтæ. Уый та уый тыххæй, цæмæй хистæр кæры фæсивæд дæр сразæнгард уой.
